Partîya Demokrasîyî û Têdûştîye ya Şaran (DEM Partî)  Anqara de otêlêke de beyannameyê weçînayîşê îdareyanê cayîyan ê 31ê adara 2024î eşkera kerd.

Pîya bi namzedanê şaredarî yê prtîye xeylêk kesî tewrê programî bîyî. Hemserekê Pêroyî yê DEM Partî Tuncer Bakirhan û Tulah Hatimogullari beyanname eşkera kerd.

Tulaye Hatimogullari vat: ''Herêma ma de û dinya de her çî serûbin bîyo. Wextê winayênî de weçînayîş est o. Rîyê şer, şîdet, vêşanîye, feqîrîye, barkerdiş û afet û medenîyetê kapîtalîstî ra xeylêk rîskî komel, xoza û bajaran tehdît kenê. Vera nê felaketan ganî têkoşîno hempar bêro kerdene. Îdarekarê Tirkîya şer wazenê, haştîye nas nêkenê. Meseleya kurdan de zere û teber de bi kaos û şerî xo weyê kenê. Nê weçînayîşî de ganî vera şerê ke îqtîdar rayra beno demokrasîyê cayîyî bêrê xurkterdene ke vengê haştîye bêro eşnawitene.''

Tuncer Bakirhanî zî nê vatî: ''Ma rayraşîyayîşê xo yê îdareyanê cayîyan ê demokratîkan bi hewayêkê qerardarî rayra benê. Ma her wextî ra zafêr qerardar ê ke xeyalanê hemrayanê xo yê ke ameyî qetilkerdene, tepiştene û surgunkerdene bîyarê ca. Wexto ke ma îdareyê cayîyî îdare kerdêne ma semedê afrinayîşê bajaran û yewîyanê cayîyan zaf kede daye ke însanî bieşkê azad biciwîyê. Ma şaredarîyê di ziwanî, sîstemê hemserekîye û tecrubeyê demokrasîyê cayîyî tarîxê nê welatî de nuştî. Ma yenê ke nê destkewteyanê xo dahîna girdêr bikerê û pîya bi şarê xo aver bêrê. Ma zaf rey ser kewtî, ma do reyna ser bikewê.  Ma yenê ke destkewteyanê şarî peyser bigêrê.''

Dima ra hetê wird hemserekan ra madeyê derheqê îdareyê cayîyî yê partîyî ameyî rêzkerdene  ke heqanê her hetê komelî, xoza û heme bawerîyan û nasnameyan pawenê û cuyeyêka newî û azad teqdîm kenê ke şarî bi îradeyê xo yê azadî biciwîyê.