Wekîlê Partîya Çep a Keske yê Amedî Avûkat Serhat Erenî  derheqê  hukmê  dewleta tirke de yo ke bi destê îqtîdarî yeno caardene  ANFyî rê qisey kerd.

Erenî bale polîtîkayanê qirkerdişî ser û nê vatî: ''Ronayîşê Komera ra heta nika semedê girdkerdişê dewlete tim hukm rolêko gird kay keno. Tirkîya de humk tim xizmetê dewlete de yo. Tarîxî ra nata no tim wina yo. Dewlete tim hukmî  vera komel,sîyaset û muxalefetî sey hacetêk şuxulnena. Hukm hema çirey bêhet û xoser nêbîyo û heqê merdiman nêgirewtî merkezê xo. Qet derdê hukmî yo sey pawitişê heqê azadîye û asayîşî çîn o. Xora îqtîdar û dewlete zî semedê nê  nêqerqilîyenê. Xora na rewşe dewlete waşte.

Dewlete hukmî ser o semedê kurdan sînor xez kerdo. Nê sînorî têna semedê sîyasetmedaranê kurdan nê, eynî wextî de semedê roşnvîr, nuştox, hunermmend , rojnameger, huquqnas û aktîvîstanê komelê sîvîlî zî xêz kerdî. Sîyasetmedarê kurdan serranê 90yan de hetê çeteyanê dewlete ra ameyêne qetilkerdene la serranê 2000î ra dima çuyeyê hukmî yeno şuxulnayene. Sîyasetmedarê  kurdan yenê tepiştene, rehîngirewtene, heqê înan yenê binpaykerdene û zîndanan de mergî rê yenê caverdayene. Hukm goreyê talîmatanê hukmatî têgêreno.Her dewaya ke vera sîyasetmedaranê kurdan bena a, xizmetê polîtîkayanê îqtîdarî kena.

Bi nê polîtîkayanê qirkeran wazenê sere de kurdî wa muxalîfî bitersê û xo peyser biancê.  Sîyasetmedarê kurdî raştê neheqîye yenê û xeylêk wext zîndanan de manenê. Senî ke mesajê tehdîtkerdişî bidê şarî. Bi muhakemerdişê KCKyî ame waştene ke sîyasetmedarê kurdan bêrê tesfîyekerdene. Xora Dewaya Kobanê de zî yeno vînayene ke hukm senî xizmetê dewlete de yo. Sîyasetmedanê ke vera çeteyanê DAÎŞî semedê têkoşînî veng dayo seba ke DAÎŞî binkewto, zîndan de yenê tepiştene ke înan ra qesas bêro girewtene.

Dewaya Kobanê û dewayanê winayênan de cezaya girane dîyena embazanê ma, heme huqûqê hukmî yeno binpaykerdene û huqûqê ceza yê dişmenîye yeno caardene. No zî eşkera verê çimanê komelî de yeno kerdene. Bi nê wazenê mesajêk bidê şarê kurdî û komelê Tirkîya. Mesaj xora zaf zelal o. 'Eke şima vera îqtîdarî bivejîyê do peynîya şima zî wina bo.' Reyna qetilkarê kurdan zî bi destê hukmî yenê pawitene. Qetilkarî bi zirxê bêcezayîye yenê pawitene û reyna kurdî yenê cezakerdene. Qetilkerdişê sîyasetmedaranê kurdan bi destê hukmî yeno meşrûkerdene. Ganî nê muhakemekerdişî pêro bikirişîyê mekanîzmayanê hukmê mîyannteweyî û nê polîtîkayê dewlete bêrê teşhîrkerdene. Çîyo tewr muhîm zî ganî vera nê polîtîkayan muxalefeto komelkî bêro rêxistinkerdene û têkoşîno hempar bêro dayene.''