Îqtîdarê AKP-MHPyî bi polîtîkayanê dişmenîye bi hezaranê cinîyê diganî û cinîyê ke dergûşê înan est ê, zîndanan de tepişena. Tirkîya bi tepiştişê domananê mabênê 0-6 serrîyan Peymana Heqanê Domanan a Neteweyanê Yewbîyayeyan binpay kena ke na peymane îmza kerdbî.

Goreyê doneyanê 2021î yê dewleta tirke 345 domanê mabênê 0-6 serrî dadîyanê xo reyde zîndan de yê. Goreyê raporanê rêxistinanê komelê sivîlî zî teyna mabênê 2015-2018î de 2 hezar û 466 domanî dadîyanê xo reyde zîndan de bîyî.

Endama Komîsyonê Domanan ê Şubeyê Îstanbulî yê Komeleya Huqûqnasan a Seba Azadîye (OHD) Yasemîne Soydan ard ziwan ke Tirkîya Peymana Heqanê Merdiman a NYyî binpay kena û îtîrazanê vera ney peygoş kena.

Soydane ard ziwan ke dadîyê ke neçare yê biewnê domananê xo ra bi hawayêkê bêhuqûqî tepişîyenê. Soydane vat: ''Dadîyî neçare verdîyenê ke zîndan de domananê xo weye bikerê. Bêguman goreyê peymane ganî Tirkîya pêro îmkananê xo seferber bikera û domanan zîndanî ra biveja. La Tirkîya de heqê bingeyî yê tepişteyan yenê binpaykerdene.

Domanî zîndan de benê şahîdê kerdişanê xiraban û îşkenceyî. Domanê ke binê nê atmosferî de benê pîl, hetê travmatîkî ra xeylêk serebûtan vînenê û nê serebûtî bi giranî tesîrê înan kenê. Domanî ganî mîyanê sîstemê huqûqî de bêrê pawitene la kerdişê bêhuqûqî zerar danê domanan. Nê kerdişî dûştê Peymana Heqanê Domanan a Neteweyanê Yewbîyayeyan a.''