Goreyê zanayîşanê peyênan ê ke selahîyetdaranê dewleta tirke dayî, wird erdlerzanê girdan ê ke 6ê sibate de Vakurê Kurdîstanî de qewimîyayî de 5 hezar û 894 kesan dinyaya xo bedilnaye.  Çimeyê herême vanê kesanê ke dinyaya xo bedilnaye hûmara înan dahîna zaf a.

Sere de Mereş, Dîlok, Semsûr û Hatay de bi mîlyonan kesê ke herême de ciwîyenê senî ke qederê xo rê bêrê caverdayene. Nê cayan de xeylêk bînayê ke rijîyayî heme tede xebata cigêrayîş û xelisnayîşî dest pênêkerda. Şar pê îmkananê xo û paştdayîşî cehd keno ke derbanê xo bipeşo. Herêma de erdlerzî ke nêweşxaneyen zî xesaro gird dîyo de malzemeyê weşîye û derman zî kêm bîyî.  Yeno vatene ke amelîyatxaneyî nêeşekenê bêrê şuxulnayene û malzemeyê amelîyatan zî kêm bîyî. Herêmanê erdlerzî de malzemeyê semedê mudaxaleyî kêm ê û ambulansî zî peydakerdişê benzînî de tengayî ancenê.

Hatay

Îskenderun, Arsuz, Belen, Antakya, Defne, Samandag, Reyhanli û Kirikhanê Hatayî de bi seyan bînayî rijîyayî. Morganê di nêweşxaneyanê Îskenderun de ca nêmendo, cenazayê ke binê rijnayîşî ra yenê vetene bi saetan wesayîtanê cenazayan de yenê pawitene. Şar ya xeymanê ke bi  îmkananê xo nayî ro de ya zî waranê venga de dormeyê adirî de şawe ravîyarneno. Îskenderun de kesê ke xebata cigêrayîş û xelisnayîşî kenê vat, ''Ekîpman, malzeme, xebatkaro zanaye çîn o. Ma binê nê rijnayîşan de têna meyîtan arêdanê.'' Şewato ke badê erdlerzî embarê konteyneran ê teyaragehê Îskenderunî de dest pêkerd, dewam keno.  Ekîbê  AKUTî xebata xo ya verêne  Nêweşxaneyê Dewelete ke rijîyayo de dest pê kerd.

Semsûr

Semsûr de hema xebata cigêrayîş û xelisnayîşî dest pênêkerda. Şar pê kepçayano ke pê îmkananê xo peyda kerdî keno le bireso kesanê binê rijnayîşî. Ekîbê AFADî şewa seşemeyî resayî bajarî la heme zî xeylêk rijnayîşan de xebete destpênêkerda. Bajar de xeylêk taxan de ceyran çîn o û operatorê înternetî zî nêxebitîyenî. Projektorê ke semedê cigêrayîşî hewce kenê, çîn ê. Qezaya Sergolan de hema newe ekîbêk cayê rijnayîşê giranî de dest pê xebate kerd. Sergolan de rewşe çend şina giranêr bena. Kuçe û rayîrê bajarî qelişîyayî. Heme bînayanê bajarî de xesar est o. Erdlerzê ke peyra bîyî de bi desan banî rijîyayî. Şar xeyman ya zî teber de dormeyê adirî de maneno.

Mereş

Mereş de zî rewşe cîya nîya. Bazarcixo ke merkezê erdlerzî yo de binê rijnayîşan de hema xebata cigêrayîş û xelisnayîşî dewam kena. Cenazayê ke di rojî yo korîdoranê nêweşxaneyî de yenê pawitene dîyenê keyeyanê înan. Yeno vatene ke xeylêk cenazayê bînî ameyî ardene nêweşxane.

Amed

Amed de de bînaya Işikî ya ke 18 cenzayê tira ameyî vetene û  yeno texmînkerdene ke hemma 28 kesî binê rijnayîşî de yê, xebata hesase ameye caverdayene û cigêrayîşê û xelisnayîşî pê makînayanê karî yeno kerdene. Yenîşehîr de zî rijnayîşê Merkezê Karî yê Dîyar Galerîa ke yeno vatene ke 78 kesî binê  de yê, xebate yena domnayene.

Dîlok

Dîlok de şarî semedê resayîşê meridmanê xo şewe serê rijnayîşan de ravîyarna, AFADî badê 17 saetan dest pê karî kerd. Dîlok de 533 awanî rijîyayî, tewr tay 200 kesan dinyaya xo bedilnaye. Xesaro tewr gird qezayanê Îslahiye û Nurdagî de est o. Taxa Încirlîyî ya qezaya Şehitkamili de yew bîna ke 50 kesî binê ci de yê ra vizêr serê sibayî panc kesî tira ameyî vetene la hema nêrasîyayo ê bînan.