12 serrî verî 28ê kanûna 2011î de 17ê ci domanî 34 dewijê Roboskî wexto ke Başûrî ra bazirganîye ra agêrayêne hetê teyarayanê şerî yê dewleta tirke ra dîyayî bombayan ver û ameyî qetilkerdene.

Erdoganî cade fermandarê qirkerdişî fîraz kerdî û Wezîrê Karanê Zereyî zî bi qiseyê 'ê cara qeçaxçî bîyê' qirkerdiş 'meşrû kerd. Nê meşrûkerdişî rayîr da dezgehanê selahîyetdaran ê bînan zî. Serdozgerîya Komare ya Amedî tehqîqatêk akerd la verî ke proseso huqûqî bêro kerdene tehqîqat ame qefilnayene.

Îfadeyê mesuldaranê qirkerdişî nêame girewtene. Îqtîdarê AKPyî zî seba ke proseso huqûqî nêro kerdene pêro hêzê xo seferber kerdî. Îqtîdarî kerd ke merdim û keyeyanê 34 qurbanan bi tepiştiş û destbendkerdişî bêveng bikero. AKPyî seba ke no qirkerdiş bêro vîrakerdene Amed de Peykerê Roboskî rijna û Komeleya Seba Roboskî Edalet, Seba Dinya Haştîye (Roboskî-Der) qefilnaye.

Wekîla DEM Partî ya Mêrdînî Kamuran Tanhanî ard ziwan ke dewleta tirke û îqtîdarê AKP-MHPyî verî ra seba ke serê nê qirkerdişî bigêrê tegêrayî.

Prosesê huqûqî yê Qirkerdişê Roboskî wina bi:

-16ê kanûna 2011î de Davut Encu, Servet Encu û Haci Encu yê ke qirkerdişî ra weş xelisîyabî 'qeçaxçîtîye' ra Fermandarîya Artêşa Tirke de îfade da.
-2012 de Serekwezîrîye vat ke ê do tazmînat bidê keyeyanê qurbanan la keyeyan no qebul nêkerd.

-Serdozgerîya Komare ya Amedî derheqê fermandaranê artêşa tirke de tehqîqat akerd la dima tehqîqat erşawîya Dozgerîya artêşa tirke.

-BDPyî qirkerdiş berd Mehkemeya Ceza ya Mîyanneteweyîye.

-Komîsyonê Roboskî yê Komîsyonê Heqanê Merdiman ê Meclîsî raporê 'dewijî qestî ra nêameyî kiştene' amade kerd û bi rayanê wekîlanê AKPyî rapor ame qebulkerdene.

-Dozgerîya artêşa tirke derheqê 5 fermandaranê xo yê mesuldaranê qirkerdişî de bira teqîbnêkerdişî daye.

-Keyeyanê qurbanan 2014 de muracatê Mehkemeya Qanûnê Bingeyî kerd la mehkeme bi îdîaya ke 'dokumentî kêm ê' dewa red kerde.

-Merdimanê qurbanan 2016 de muracatê Mehkemeya Heqanê Merdiman a Ewropa kerd la na mehkeme zî dewa red kerde.

Kamuran Tanhanî bale ante redkerdişê dewayanê merdiman ser û ard ziwan ke no prosesê redkerdişî goreyê huqûqî nîyo.