Avûkatanê Buroyê Huqûqî yê Şarî ra Naim Eminogluyî derheqê rewşa hepîsxaneyanê Tîpê Syî û ferqê înan bi Tîpê Fyî de ANFyî rê qisey kerd.

Eminogluyî ard ziwan ke heta nika Manavgan, Kavak, Bodrum, Antalya, Îdîr û Kirkşehir de 6 hepîsxaneyê Tîpê Syî ameyî kerdene û vat  nika bi temamî 3 hezar û 312 kesî nê hepisxaneyan de yê û nînan ra hezarî ra zafêr kesî tepişteyê sîyasî yê.

Eminogluyî wina vat: ''Tirkîya de 2021 de verî hîrê hepîsxaneyê Tîpê Syî ameyî akerdene û dima ra hûmara ci zêdîyaye. Kapîseteya nê hepîsxaneyen her hepisxane de hendê 552 kesan o. Bi temamî 3312 kesî.  Hîrê muvekîlê buroyê ma nê hepîsxaneyan de yê. Mabanê Tîpê S û Fyî de di ferqê muhîmî est ê. Tîpê Syî de hucreyê yewkesan hucreyanê hîrêkesan ra zafêr ê. Tîpanê Fyî de tam eqsê ci yo. Ferqo bîn zî tîpanê Syî de  katê cerênî ê hucreyê hîrêkesan de kamareyî est ê. Banyo û tuwalet zî nê qisman de yê.''

Eminogluyî derheqê îşkenceyî de zî nê vatî: ''Muwekîlanê ma yê Tîpê Syî ra xeberê di tewirê cîyayî yê îşkenceyî ameyî. Înan ra yew dekewtişê hepisxaneyî de cigêrayîşo rut yeno kerdene û gama ke tepişteyî vera ci vejîyenî raştê îşkenceyî yenê û o bîn zî seba ke tepişteyî kamerayan qebul nêkenê,  raştê îşkenceyî yenê. Manavgat de seba ke muwekîlanê ma Şîmale Gun û Beyhane Gun bi peçete kameraya ke banyo û tuwaletî vînena qefilna, raştê hêrişî ameyî û di rojî huceryê sungerin de mendî.''

Naim Eminogluyî  vat: ''Nê tîpê Syî sey dewamê  poltîkaya tecrîdî Tîpê Fyî ameyî akerdene. Xeberê îşkenceyî ke nê hepisxaneyan ra yenê caardişê sîstematî yê polîtîkayanê tecrîdî yê. Prosesê ke bi qirkerdişê hepisxaneyan ê 19ê Kanûna 2000î dest pê kerd bi hepisxaneyê tîpê S û Yyî resa merheleyêka bîne. Na rewşe xora têna tepişteyanê sîyasîyan eleqedar nêkena. Tecrîd eynî wextî de hepisxaneyan ra dest pêkeno heme komelî rê vila beno. Bi akerdişê hepisxaneyanê Tîpê S û Yyî şarî ra vanê 'mevejê teber, qale mekerê û mefikiryê.' Tîpanê Syî de caardişê tecrîdî bi kamereyan yenê kerdene. Kam ke vera ci vejîyeno raştê îşkenceyî yeno.''