Avûkatanê Buroyî Huqûqî yê Asrinî ra Avûkat Îbrahîm Bîlmezî derheqê tecrîdê Îmralayî de ANFyî rê qisey kerd.

Bîlmezî bale ante tecrîdê Îmraliyî ser û nê vatî: ''25ê adara 2020î ra nata ma qet xeberêke muwekîlê xo ra nêgirewte. Coka ma zaf qerqilîyenê. Çîyo winayên qet welatanê huqûqî de nêqewimîyeno. Îmrali de tecrîd sîstematîk yeno caardene. Hinî ma nêeşkenê vajê no çîyêko keyfî yo. Herinda huqûqî zorbazîye girewta. Eke qanûn çîn o zorbazîye est a. Seba ke ma muwekîlanê xo reyde pêvînayîş bikerê heta ewro cayo ke ma muracat nêkerd, nêmendo la tim dêsêk vejîyeno verê ma. Muxatabê ma xora bewlî yê. Sere de Serdozgerîya Komare ya Bursa û Dadgerîya Înfazî ya Bursa  ma muracatê heme dezgehanê eleqedaran kerd la qet netîceyêke dest nêfîna.  Gama ke qala Îmraliyî bena huqûq nêvînayîşî ra yeno. 6 mengan de rayêke bi qerarê dadgerîya înfazî pêvînayîşê ma yê bi muwekîlanê ma yeno astengkerdene.

Ma badê erdlerzê Gemlîkî zî rixmo ke hend muracat kerd, netîce nêgirewt. Erdlerzê Mereşî yê 6ê sibate de zî keyeyê hîrê muwekîlanê ma yê ke Îmrali de binê tecrîdî de yê, bajaranê ke binê tesîrê erdlerzî de mendî, tîya ciwîyenê. La rixmê nê muracatê ma bêvewab mendî. Yew heqê telefon zî zaf dî. Zîndan de heqê gêrayîşê keyeyan dîya tepişteyan la no heqê tepişteyanê Îmraliyî ame binpaykerdene. Reyna seba ke ma muracatê dezgehanê heqanê merdimanê Ewropa kerd, Komîteya Heqanê Merdiman ê Neteweyanê Yewbîyayeyan qerarê tedbîrî da la Tirkîya no zî nêard ca. Tirkîya qeraranê CPT û dezgehanê bînan ê Ewropa yê ke derheqê tecrîdê Îmraliyî de yenê girewtene, nêana ca. Nê hetî ra huqûqî nas nêkena. Na rewşe Tirkîya sîstemê Ewropa ra fînena dûrî.''

 Bîlmezî vera bêvengîya vera tecrîdê Îmraliyî hêrsê xo ard ziwan û vat, ''Ya şima hetê huqûqî de ya zî ney. Bintayê nê çîn o. Nê hetî ra êyê ke tecrîdê serê muwekîlê ma Birêz Ocalanî nêvînenî û qala huqûqî kenê, dirîtîye kenê. Eke şima vanê huqûq wa verî Îmrali de bêro caardene. Bêhuqûqîya ke nêvînayîşî ra yena siba beno ke vera to bibo. Na nûqta de wa çew kurdan rexnê mekero. Semedê caardişê huqûqî tepişteyî reyna grevê vêşanîye de yê, nobetê edaletî yenê tepiştene.  No têna problemê kurdan ney, kam ke xo rê vano soyalîst, demokrat û derdê ci yê huqûqî est o, problemê nê pêrun o. Birêz Ocalan semedê şaranê Tirkîya şansêk o. Seke wextê dîyalogî de zî ame vînayene, Birêz Ocalan çîyo ke destê ci ra ame kerd. La muxataban ê goreyê menfeatê xo yê vîjnayîşî têgêrayî.

Ma semedê muwekîlanê xo zaf qerqilîyenê û wazenê cade pêvînayîş bikerê. Ma do newera muracatê Wezîrîya Edaletî bikerê.  Kam ke huqûq û edalet wazeno ganî vera zorbazîye Îmraliyî bivejîyo.''