61 sîyasetmedar, hunermend, akademîsyen û pawitoxanê heqan ê fransayîjan Komîteya Vergirewtişê Îşkenceyî (CPT) rê mektube şawitbî ke vera tecrîdî têbigêrê. Nê kesan ra sîyasetmedar Dylan Boutiflatî ANFyî rê derheqê tecrîdê vera Rayberê Şarê Kurdî Abdullah Ocalanî de qisey kerd.

Dylan Boutiflatî dîyar kerd ke înan seba ke bimojnê Ocalan vîran de yo mektube şawita CPTyî û vat: ''Ma hinî tehamul nêkenê ke Tirkîyaya ke endama Konseya Ewropa ya prensîbanê huqûqê mîyanneteweyîyî nêana ca. Ma amade yê ke seba waştişanê kurdan têkoşîn bikerê. Mi gore Ocalan maneno Nelson Mandelayî. Ocalanî rayberîya têkoşînê azadîya kerde. La 25 serrê ci hetê Tirkîya ra ameyê diznayene. Ganî ewro ma seba azadîya Ocalanî, destûrê pêvînayîşan û çareserîya meseleya kurdan pêro îmkananê xo seferber bikerê. Çunke Abdullah Ocalan temsîlkarîya muxalefetê vera otokrasî keno.''

Dylan Boutiflatî îfade kerd ke Erdogan rêxistinanê terorîstan de têkilîyan keno û Tirkîyay Erdoganî dewletêka otokratîk a û vat: ''Na rewşe seba erjanê Ewropa zî tehluke ya. Erdogan prensîbanê huqûqî, bi taybetî ê huqûqê Ewropa ra dûrî kewto. Na rewşe bîye sebeb ke Tirkîya Ewropa ra dûrî bikewa û nêzdîyê rejîman biba.

10-15 serrî yo Yewîya Ewropa derheqê dewaya kurdan de bêxem a. Ma sey çepgîranê Ewropa giranîye danê têkoşînê kurdan. La dewletê Ewropa têkoşînê kurdan ê vera DAÎŞî û rejîmê Erdoganî nêvînenê. Coka ma xo tayêk teyna hîs kenê. Bêvengîya selahîyetdaranê Ewropa meseleyan giranêr kena. Kurdî seba kultur, ziwan û estbîyayîşê xo şer kenê. Coka ma Yewîya Ewropa ra do hesabê înkarkerdişê waştişanê kurdan bipersê.''

Dylan Boutiflatî ard ziwan ke ganî vera PKKyî Yewîya Ewropa ra dirîtîya xo ra fek vera bida û vat: ''Ganî ma mantiqî ra dûrî nêkewê û PKK lîsteya terorî ra vejîyê. Ganî ma babeta PKKyî de akerde bibê. Erdogan vera Ewropa kayan kay keno. Coka ganî ma zî sey demokratanê Ewropa rolanê xo kay bikerê.''