Hemserekê KESKî Bozgeyîkî ard ziwan ke 15ê gulane de seba xizanan, cinîyanê ke destkewteyê înan hedef benê û seba ciwananê ke bêkarîye rê ameyê mehkumkerdene, ê eşkenê dewrêkê neweyî bidê destpêkerdene.
Hemserekê Pêroyî yê Konfederasyonê Sendîkayanê Kedkaranê Umûmîye (KESK) Mehmet Bozgeyîkî derheqê weçînayîşan de ANFyî rê qisey kerd.
Bozgeyîkî dîyar kerd ke weçînayîşan de birêka winayêne yena girewtene ke eşkena seserra bîne ya Tirkîya eşkera bikera. Bozgeyîkî vat: ''Polîtîkayê îqtîdarê AKP-MHPyî benê sebebê xizanîye. Teyna seba Tirkîya ney seba şaranê Rojhelatê Mîyanênî, şaranê dinya û seba kedkaran nê weçînayîşî zaf girîng ê. Eke Îtîfaqê Kede û Azadîye bi hawayêkê xurtî bikewo Meclîsî seba kedkaran qanûnê neweyî do bêrê viraştene. Seba ke Tirkîya de zemînêko demokratîk bêro awankerdene nê weçînayîşî do gamêke bibê. 15ê gulane de seba xizanan, cinîyanê ke destkewteyê înan hedef benê û seba ciwananê ke bêkarîye rê ameyê mehkumkerdene, ma eşkenê dewrêkê neweyî bidê destpêkerdene.''
Bozgeyîkî bale ante operasyonanê qirkerdişê sîyasî yê 21 şaristanan ser û vat: ''250 avûkat, hunermend, temsîlkarê rêxistinan, sîyasetmedar, cinî û ciwanî lîsteya destbendkerdişî de yê. Îqtîdar wazeno ke prosesê weçînayîşan de provakasyon bikero. La rixmê ney zî şar 14ê gulane de ganî şoro sindoqan ser û seba binvistişê îqtîdarî seferber bibo.''
Bozgeyîkî da zanayene ke 1ê Gulane Roja Karkeran a Dinya de Îstanbul, Îzmîr, Anqara, Adana, Mersîn, Dîlok, Amed û Wan sere de xeylêk şaristanan de çalakîyî do bêrê kerdene û venga pêro kesan da ke bi ruhê Newroze tewrê çalakîyan bibê.
