Bremen û Malmo de serrgêra 45. ya ronîyayîşê PKKyî bi coşêkê pîlî û şayîyan ameye fîrazkerdene. Şayîyan de Operasyonê Şorişgêrî yê gerîlayan zî ameyî selamkerdene.

Şaristanê Bremenî yê Almanya de Merkezê Komelê Demokratîkî yê Kurdan (NCDK) de şayîye ameye viraştene. Şayîye de Xezale Yalçin, Hemserekê Merkezê Komelê Demokratîkî yê Kurdan ê Aurichî Şehmus Yoldaş, Hemsereka FED-DEMî Sebahate Ergîn û Hemserekê NCDKyî yê Bremenî Saîd Bîlgînî qisey kerd. Înan bale ante Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' ser û venga her kesî da ke wa paştî bido hemle.

Şayîye de hunermendî Seyda Perînçek, Xemgîn Bîrhat, Silbûs û Tarî, Ozgur Comert, Îdrîs Bagok, Îbo Qamişlo, Ziyadîn Dogan vejîyayî sehne ser. 

Şaristanê Malmoyî yê Swêdî de zî bi şayîyêke ronîyayîşê PKKyî ame fîrazkerdene. Şayîye de hunermendî Lavîn Kobanê, Ergîn Xelîkan, Hozan Peywan û Hozan Axîn Perînçek vejîyayî sehne ser. Şayîye de sloganê sey  "Bijî PKK" û "Bijî Serok Apo" ameyî vatene û grevê vêşanîye yê tepişteyan ame selamkerdene.