Partîya Çep a Keske çarçeweya weçînayîşanê 14ê gulane de Mûş de mîtîng kerd. Hemsereka Pêroyî ya HDPyî Pervîne Buldan, Hemserekê Pêroyî yê DBPyî Keskîn Bayindir, temsîlkarê Partîya Azadî û namzedê wekîlîye tewrê mîtîngî bîyî. Mîtîngo ke warê Kobanê de ame kerdene  bi hezaran kesî bi slogananê "jin, jiyan, azadî", "Bijî berxwedana zindanan" û "Bijî serok Apo" tewrê ci bîyî.

Namzedan Serhat Dursun, Summeyye Boz û  û Sezai Temelliyî bale ante ser ke îqtîdarî welat senî fînayo mîyanê tengayî û vat wextê ci ameyo ke no îqtîdar bêro wardayene.

Hemserekê Pêroyî yê DBPyî Keskîn Bayindirî vat: "Kurdan heta ewro her çî bi têkoşînî fîna dest. Nê weçînitişî weçînitişê cinîyan û ciwanan ê. Ma do serkêşîya ciwanan de nê rejîmî birijnê. Ma do bi nê tewirê şima verê çareserkerdişê meseleya kurdan abikerê. Beranê zîndanan abikerê. Hinda çew nêeşeno verê ma bîgêro. 14ê gulane de şarê ma do ser bikewo û ma verê azadîye abikerê. Ma do govenda azadîye meydanê Mûşî de bigêrê."

Hemsereka Pêroyî ya HDPyî Pervîne Buldan zî nê vatî: "Tayîp Erdogan wexto ke ame îqtîdar vatbi bê engiştaneyo ke destê ci de yo yewna servetê ci çîn o. Inkey bîyo Efendîyê Engiştaneyan. Çunke înan dizna. Vera îradeyê kurdan qeyûmî ca kerdî. Şaredarîye xesp kerdî. Dişmenîya kurdan kerd. Inkey vanê wayûbirayanê ma kurdan dir problamê ma çîn ê. La problemê ma, şima dir est ê. Zîndanî pê temsîlkarnê kurdan dekerde yê. Hema di rojî verî hunermend, avûkat  û îdarekarê kurdan destbend kerdî. Kurdan rixmê heme zextan çirey milê xo çewt nêkerd. Kurdî do sindoqan de şima ra hesab bipersê."

Badê mîtîngî xeylêk ciwanî û îdarekarê partî bi îşkencekerdişî ameyî destbendkerdene. Kesê ke ameyî destbendkerdene bado ke ameyî berdene Nêweşxaneyê Dewlete yê Mûşî ameyî berdene Mudirîya Polîsan ê Mûşî.