Qezaya Pasûrî ya Amedî de qeymeqamê dewlete bi pawitoxanê xo îmamê camîyêke derb kerdbî. Serekê Komelê Îslamî yê Kurdîstanî (CÎK) Ahmet Hafiz Turhalliyî ANFyî rê qisey kerd û îfade kerd ke dewleta tirke bi rayîrê Dîyanetî dînê serê esasê nîjadperestîya tirkan ferz kena.

Turhalliyî ard ziwan ke dewleta tirke seba ke dînî bi nîjadperestîya tirkan û kemalîzmê kesî entegre bikera û mîyanê kurdan de cabikera Dîyanetî şuxilnena. Turhalliyî vat: ''Dîyanet pêro camîyan visneno binê kontrolê xo. Na babete de camîyêka Pasûrî nimûne ya. Rixmo ke Pasûr de xeylêk camîyî est ê, qeymeqam qestî ra şino a camî. Çunke qeymeqam pê 'îmamê a acamî ' bawer nîyo. Weazî ra dima zî qeymeqamî bi mîkrofonî îmam derb kerd. No zî mojneno ke dîn senî seba sîyasetî şuxilîyeno.

Dîyanet seba ke dewlete, turanîzm û tirkayetîye gandar bibê xebitîyeno. Serebûtê îmamê Pasûrî zî eşkera keno ke rixmo ke îmamî vato babîyê ey qoricî û birayê ci zî wezîfedarê dewlete yo xezebê dewlete ra nêeşkeno xo bixelisno. Dîyanet pabesteyê îdeolojîya resmî ya dewleta tirke yo û goreyê Îslamîyetî tênêgêreno. Ez venga pêro misilmananê raştikênan û kurdan dana ke peyê îmamanê Dîyanetî de nimak mekerê. Tirkîya de camîyan de mîmberê pêxemberî seba zulmê dewlete şuxilîyeno. Ma ganî peyê nînan de nêşorê. Camîyê înan warê dewlete yê. Ma tornê Şêx Seîd û Selahaddîn Eyyubî yê. Kurdê misilmanî ganî nêşorê camîyanê înan.''

Turhalliyî vist vîrî ke Îslam de meqamê şehadetî bi ayet û hadîsan eşkera yo û vat: ''Kam seba pawitişê mal, dîn, namusê xo şer bikero û bimiro şehîd beno. La êyê ke welatê şarê bînî îşxal kenê û nê rayîrî de mirenê şehîd nêbenê. Kurdî seba pawitişê cuye, namus, erd û dînê xo têkoşîn kenê. Goreyê Quran û hedîsan şehîdî kurd ê. Îşxalkerî şehîd nîyê.''