Wekîla Partîya Kede ya Antepî Sevda Karaca Demîr da zanayene ke 15ê tebaxe de aye Zîndanê Kandira de Gultane Kişanak, Fîgene Yuksekdag û Nurhayate Altun zîyaret kerdê.

Sevda Karaca Demîr pare kerd ke cenazaya waka xo ra dima vera Gultene Kişanak îşkence û muameleyê xirabî ameyê kerdene.

Karaca Demîr medyaya dîjîtale de zîyaretê xo ser o nê çîyî vila kerdî:

''Waka Birêze Gultane Kişanak nêzdî de dinyaya xo bedilnabî, ez şîya mi Gultane ra serweşîye waşte. Gultane Kişanak wextê şîyayîşê cenaza û agêrayîşê Kandira de raştê îşkence û ferzkerdişan menda. 

Cenaza ra dima a herinda Kandira de bê xebera ci, ameya berdene bi Zîndanê Xarpêtî. Aye waşto ke hetê embazanê xo de bimana la ameya dekerdene cayê sey depoyî. Roja bîne Gultane îdareyê zîndanî ra vato 'Şima seke remnenê ez bi lezî arde tîya. Ez heqê xo yê telefonî wazena, avûkata xo de qisey kena.' Israrê aye ser o Gultane pê telefonî xebere dana keyeyê xo. Keyeyê aye zî xebere daya avûkatan û avûkatî şîyê zîndanî. Saetêke û nêm ra dima avûkatî ancax a dîya la cendirmeyan cade a pêvînayîşî ra berda. Cendirmeyan poşetêkê nanî dayo destê ci û pê wesayîtê rîngî 7 saetan ra dima a berda Sêwasî. Seba ke 'teyara çin a' ameya berdene bi Sêwasî. La mesrefê nê teyarayan hêverî dîyabi îdareyê zîndanî. Şewe saete 03.00 de a resaya Zîndanê Kandira.

Na muamelaya xirabe meşrû nîya. Tepişteya ke hema newe waka xo defin kerda, vera ci îşkenceyo winayên bêhuqûqî û bêwijdanî ya. Ganî na rewşe bêra îzehkerdene û mesuldarî bêrê eşkerakerdene. Ma na babete de Wezîrîya Edaletî ra yew eşkerayîye pawenê.''