Îstanbul de vizêr hetê dezgehanê huquq û komelê sîvîlî ra derheqê cenazayanê ke Goristanê Garzanî ra ameyî remnayene û Goristanê Kîlyosî de kişta rayîrî de pêser ameyî definkerdene de eşkerayîya çapemenîye ameye dayene.

Eşkerayîya hempare hetê Sereka ÎHDyî yê Beşê Îstanbulî Gulserene Yolerî ra ameye wendene. Yolerî vat: ''Goristanê Garzanî 13 goristanan ra yew o ke gerîlayê ke tarîxanê cîya cîyayan de şehîd bîyî tede ameyî definkerdene. No goristan bi zanayîşê hukmatî ame înşakerdene la badê qedîyayîşê prosesê dîyalogî raştê hêrişan ame. Bi bombakerdişê hewayî ra û makînayanê kerî goristan ser û bin bi ke cayê naye huqûqê mîyanneteweyî de çîn o. Erdogan qiseykerdişê xo yê 3ê sibat a 2018î yê Bedlîsî de bi vatişê‚‘‘Ê gorê sexteyî nika ça de yê?‘‘ wayîrê nê hêrişî vejîya. Rixmê xîretkerdişê keyeyan cenazayî nêdîyayî keyeyan. Badê di serran bêxeberdarkerdişê keyeyan 282 cenazeyî Goristanê Kîlyosî de kişta rayîrî de pêser ameyî definkerdene.''

Yolerî vernîyazê înan ê derheqê cenazayan de wina rêz kerdî:

* Ganî berpirsîyarê rijanyîşê Goristanê Garzanî bêrê cezakerdene.

* Cenazayê ke goranê înan ra vejîyayî nasnameyê înan bêrê safîkerdene û teslîmê keyeyanê înan bê.

* Cenazayê ke nasnameyê înan bewlî nebênê hetê pîsporan ra wa kişta rayîr de cayo ke komkerde defin bîyî ra vejîyê û Garzan de newe ra bêrê definekerdene.

* Keyeyê ke cenazayê înan kişta rayîrî de pêser ameyî definkerdene semedê travma û dejo ke înan anto wa înan ra ozr bêro waştene.

Rewşene Donera ke bi nameyê keyeyan kurdkî qisey kerd vat: ''Wexto ke ma şîyî Goristanê Kilyosî ma dîyî ke qicê ma mîyanê zalab de ameyî definkerdene. Kam yew kitabê dînî de cayê naye esto. Ma no zilmo ke cenazayanê ma rê beno qebul nêkenê. Ma keyeyî hîrê serî yo nê dejî ancenê. Waştişê ma oyo ke cenazeyê ma bêrê teslîmkerdene. Semedê naye zî çîyo ke destê ma ra yeno ma do bikerê.''

Hemserekê ANYA-KAY-DERî Şehmus Işik zî no sey huqûqê dişmenîye name kerd û vat: ''Tay keyeyî vanê cenaza 4 rey ameya definekerdene.  Keyeyan rê dej yeno antene, cenazayan ser o travma yena afernayene. Dinya de reya verêna ke goristan ra cenazeyî yenê remnayene. Ganî şarê Tirkîya vera nê dejî hîsgêr bo.''

Wekîlê HDPyî Hîşyar Ozsoy zî ard ziwan ke vera cenazayan û goristanan hêrişo sîstematîk yeno kerdene û vat: ''Merdeyanê kurdan zî merdeyan ra nêhesibnenê. Eke sey mergê merdîmî qebul bikerê hurmet ramojnenê. Goreyê înan kurdî layîqê mergî merdimî nîyê. Dewlete wazena ke nê mergan bikero bêqiymet. Kam ke vera merdayan şer kerdo, vînî kerdo. Ê eşkenê cenazayan medê la se kene wa bikerê nêeşkenê cenazayanê bikerê bêqîmet, ma do desturê naye medê.''