Bajarê Cenevre yê Swîsre de verê Ofîsê Neteweyanê Yewbîyayeyan (NY) de semedê paştdayîşê grevê vêşanîye yê tepişteyan ê 27ê teşrîna peyên a 2020î çalakîya roniştişî amebî despêkerdene. Na çalakîye 3 serrî xo dima verdayî. Bi wesîleya serrgêra çalakîye vizêr rayraşîyayîş ame kerdene.

Çalakîya ke hemleya "Dem Dema Azadiyê ye" de dîyaye destpêkerdene her roja çarşemeyî ameye kerdene û paradîgmaya Abdullah Ocalanî bi aktîvîteyanê cîya cîyayan rayrapêroyîya dinya rê dîyaye nasdayene.

Rayraşîyayîşo ke bi wesîleya serrgêra çalakîya roniştişî ame kerdene, bi seyan kesî tewrê ci bîyî.

Şaro ke Meydanê Palais Wilsonî de ame têhet ke banê Komîserîya Berze ya Heqanê Merdiman ê Neteweyanê Yewbîyayeyan (OHCHR)  tede yo, tîya dest pê rayraşîyayîşî kerd. Verê rayraşîyayîşî eşkerayîye ameye dayene. Hemsereka CDK-Syî Selma Surer vat ê do bi hewayêkê qerardarî berpirsîyarîya xo bîyarî ca û Rayberê xo biresnê azadîya ci ya fîzîkîye.

Badê eşkerayîye bi slogananê"Bijî Serok Apo", "Be Serok Jiyan Nabe", "Jin Jiyan Azadî" rayraşîyayîş ame kerdene. Dima ra warê çalakîya roniştişî de bi nameyê KCDK-E sîyasetmedar Mehmet Aslanî qisey kerd.

Aslanî xoverdayîşê gerîlayan û grevê vêşanîye yê tepişteyan selam kerd û vat, ''Ganî Rayberê Şarê Kurdî Abdullah Ocalanî hinî bibo azad.'' Aslanî vist vîrî ke kurdî rixmê heme zextan wayîrê Rayberîya xo vejîyayî û vat, '' Şarê kurdî do çirey milê xo çewt nêkero.'' Aslanî vat, ''Ewropa xeyrê xoverdayîşê kurdan belayê DAÎŞî ra kewt dûrî. Eke kurdî semedê şaranê dinya xo ver danê, ganî NY û welatê Ewropa zî semedê azadîya şarê kurdî rol bîgêrê xo ser û semedê naskerdişê heqanê kurdan cehd bikerê.''

Dima ra sey temsîlkerdişî maketê hucreyê Îmraliyî ardîya warî. Badê parçekerdişê maketî çalakwanan xeyma çalakîye de çalakîya xo daye domnayene.