Mîtîngê Partîya Çep a Keske yê cinîyan ê Wanî de bi hezaran kesî ameyî têhet. Hemsereka Pêroyî ya HDPyî Pervîne Buldan vat: “Ma nêqedîyayî, do meqedîyê. Ma çîn nêbîyî, do mebê. Ma est ê, do tim bibê.”
Partîya Çep a Keske çarçeweya vîjnayîşanê 14ê gulane de qezaya Rêya Armûşê ya Wanî de reya dîyine mîtîngê cinîyan viraşt.
Mîtîngo ke Parka Mûsa Anterî de ame kerdene bi hezaran kesî tewrê ci bîyî. Mîtîng de sloganê "jin, jiyan, azadî", "Bijî berxwedana zindanan" û "Bijî serok Apo" bîyî berz.
Komîteya amadekerdişê mîtîngî ra Ebru Demîrtepe vera destbendkerdişan hêrsê xo ard ziwan û vat "Ma do ser bikewê, şima do şirê."
Vervatoxa Partîya Çep a Keske ya Wanî Gonule Uzunay zî vat vera zextanê îqtîdarî bi serran o cinî, ciwan û temsîlkarê nê şarî milê xo çewt nêkenê do çirey zî milê çewt mekerê.
Dima ra Başak Demirtaş qisey kerd vat ê vera zext û hêrişan her ca de yê û xover danê.
Hemsereka Pêroyî ya HDPyî Pervîne Buldan zî nê vatî: "Vîjnayîşî rê 18 rojî mendî. Ma têkoşîn kenê ke nê sîstemî bibedilnê. Îqtîdar bi operasyonanê qirkerdişê sîyasîyî cinîyan, ciwanan û sîyasetmedaran destbend keno. Pê operasyonan kenê ke verê ma bîgêrê. Ma ewro tîya ra reyna cewab danê. Wa îdarekarê welatî hole bîewnê nê meydanî ra. Wa bivînê ke cinîyî senî sereberz semedê azadîye têkoşîn kenê. Cinîyê ke qesranê înan recifnenê û leqnenê bi gamanê pêtan yenê. Êyê ke wazenê verê ma bîgêrê, ma vindarnê wa bizanê ke; ma nêqedîyayî, do meqedîyê. Ma çîn nêbîyî, do mebê. Ma est ê, do tim bibê. Cinîyê erjîyayeyî êyê ke îradeyê şima nas nêkenê, şima zî înan nas mekerê. Înanê ke nê bajarî de qeyûm ca kerd, îradeyê şima Bekîr Kayayî xo vîr a mekerê. Cinîyê Wanî do 8 namzedanê Partîya Çep a Keske bişawê meclîsî."
