Ciwanê bi nameyê Kerem Îmrak 17ê kanûne de saetanê şanî de taxa Yakupluyî ya qezaya Beylîkduzuyî ya Îstanbulî de hetê tay kesanê ke xo sey polîsan dayo şinasnayene ra ame remnayene û îşkence dî.

Kerem Îmrako ke 20 serrî yo Îstanbul de ciwîyeno û xebitîyeno 2011 de bi bahaneya 'endamîya rêxistine' amebi destbendkerdene û 3 serran zîndan de mendbi. Îmrak 2015 de ancî bi bahaneya 'endamîya rêxistine' tepişîyabi û 2019 de zîndanî ra vejîyabi.

Kerem Îmrakî ANFyî rê qisey kerd. Îmrakî da zanayene ke 17ê kanûne de serebût wina qewimîyayo: ''Wesayîtêko sipî verê mi de vindert û tira 2 kesê sivîlî vejîyayî. Înan nasnameyê mi kontrol kerd û mi rê vat ke derheqê mi de 2017 de dosyayêke ameya akerdene û ganî ez îfade bia. Înan wesayît de telefon, cizdan û çanteyê mi girewtî û ez berda cayêkê nedîyarî. Uca de polîsan mi rê îşkence kerd û mi rê ajanîye teklîf kerde. Înan vat ke do meaş bidê mi. Seba ke mi cewab nêda persanê înan, yewê înan kerd ke engiştê mi bişikno. Nê polîsî vat ke eke çew teklîfê înan ê ajanîye qebul nêkero ê ci rê îşkenceyê cînselî zî kenê û bi kamera qeyd kenê.''

Îmrakî ard ziwan ke îşkenceyê bi saetan ra dima polîsan fam kerd ke o do qisey nêkero coka Îmrak tehdît kerdo. Îmrakî vat: ''Polîsan vat ke eke ez heta 18ê kanûne Îstanbulî terk nêkera ê do mi bikişê. Dima polîsan kincê mi dayî mi û ez kiştêka rayîrî de wesayîtî ra eşta. Înan telefon û cizdanê mi dayî la çanteyê mi nêda. Roja bîne ez û avûkatê mi, ma şîyî raporê derbe girewt û mi gerreyê sûcî kerd.''

Avûkatê Îmrakî zî da zanayene ke ê do serê serebûtî de vinderê û kerdoxanê îşkenceyî eşkera bikerê.