Covid-19: Tirkîya de hûmara merdeyan bîye 30
Wezîrê Weşîye yê Tirkîya Fahrettin Kocayî eşkera kerd ke 24 saetanê peyênan de 9 kesê bînî vîrusê Korona ra merdî û hûmare bîye 30.
Wezîrê Weşîye yê Tirkîya Fahrettin Kocayî derheqê Korona de hesabê xo yê Twîtterî ra zanayîş da.
Kocayî vat: ''Ewro 9 nêweşan cuya xo vînî kerde û 289 kesê bînî pê janî kewtî. Ma rîsk megêrê. Cuye keye de ca bêno. Heta ewro pêro pîya 20. 345 testî ameyî kerdene, 1.256 kesan de pozîtîf vejîya, 30 nêweşê ke heme extîyar bî cuya xo vînî kerde.''
Vizêr hûmara merdeyan 21 bî û ya nêweşanê neweyan 277 bî.
Tirkîya de janê Korona fermî 10 adare de ame eşkerakerdene. 16ê adare de hûmara nêweşan bîye 18 û dima ra bi zêdbîyayîşî dewam kerde.
