Buroyê Huqûqî yê Asrinî da zanayene ke ê 30 mengî yo muwekîlanê xo Rayberê Şarê Kurdî Abdullah Ocalanî, Omer Hayrî Konar, Hamîlî Yildirim û Veysî Aktaşî ra xeberêke nêgênê. Buroyî muracatê Komîteya Vergirewtişê Îşkenceyî (CPT) kerd ke wa cade Zîndanê Îmraliyî zîyaret bikero. 

Muracat de Buroyê Huqûqî yê Asrinî nê çîyî ardî ziwan:

''Muwekîlê ma binê tecrîdêkê mutleqî de tepişîyenê û pêro rayîranê têkilîyan ra bêpar verdîyenê. Ma seba ke nê tecrîdê mutleqî, rewşa incommunicadoyî û binpaykerdişê qedexeyê îşkenceyî de agahîyan bidê û waştişanê xo vajê nê muracatî kenê. Ma mabênê 30ê nîsane û 31ê temmuza 2023yî de 25 reyî seba pêvînayîşê avûkatan û 12 reyî seba pêvînayîşê keyeyan muracat kerd la cewab nêdîya înan. Mektubê muwekîlanê ma û mektubê ke şawîyenê Îmraliyî nênê dayene.''

Asrinî vist vîrî ke 30ê hezîrana 2023yî de reyna cezaya dîsîplînî dîyaya muwekîlê înan Abdullah Ocalanî û bi na bahane muracatê înan ameyê redkerdene. Buroyî bale ante ser ke pê nê cezayanê dîsîplînî dewleta tirke kena ke serê bêhuqûqîya xo bigêra.

Muracat de ame parekerdene ke avûkatî 27ê temmuza 2011î ra nata nêeşkenê muwekîlanê xo de pêvînayîş bikerê û no kerdiş vera huqûqî yo. Avûkatan da zanayene ke qesawetê serê Rayberê Şarê Kurdî asta tewr berze de yo û hukmatê AKPyî waştişanê CPTyî nêano ca.

Buroyê Huqûqî yê Asrinî vat ke ganî CPT bi hawayêkê lezabezî şoro Îmraliyî zîyaret bikero û waştişê xo wina rêz kerdî:

''-Wa komîteya şima bi lezî şoro zîndanî, raporê xo yê zîyaretî eşkera bikero

-Wa avûkatî cade bieşkê muwekîlanê xo bivînê û pê qeraranê mehkeme hînî verê pêvînayîşan nêro girewtene.

-Wa cade keyeyî bieşkê şorê pêvînayîşan û pê cezayanê dîsîplînî verê pêvînayîşan nêro girewtene.

-Wa heqê telefonî yê tepişteyan bêro dayene.

-Wa astengîyê verê rayîranê têkilîye yê sey mektube, telgraf û faksî bêrê wedaritene.

-Wa rojname, kovar û kitabî bêrê dayene muwekîlanê ma û qedexeyê serê nînan biqedo.

-Wa vera îşkence, kerdişanê xiraban û rewşa incommunicadoyî tedbîrî bêrê girewtebe û Madeya 10/2 ya Peymana CPTyî bêra caardene.''