Hemserekê Komeleya Heqanê Merdiman (ÎHD) û namzetanê Îstanbulî yê Partîya Çep a Keske ra Ozturk Turkdoganî derheqê weçînayîşan de ANFyî rê qisey kerd. 

Turkdogano ke huqûqnas o, vist vîrî ke 24ê temmuza 2015î qedîyayîşê prosesê çareserîye ra nata şer û pêkewtişî bêmabên dewam kenê coka krîzo ekonomîk qewimîyeno. Turkdoganî vat: ''Mi vat ke hînî ez tecrubeyanê xo yê warê heqanê merdiman sîyaset de bişuxilna. Ma do tewirê xo yê dîyarî Meclîs de derheqê binpaykerdişê heqanê merdiman de bimojnê. Ez tewr zaf wazena ke prosesêkê çareserîye yo newe dest pêbibo.''

Turkdoganî bale ante ser ke Meydanê Galatasarayî Mayanê Şemeyî rê qedexe yo û na bire kêfî ya. Turkdoganî vat: ''Heqê çalakîkerdişî heqo tewr bingeyî yo. Mehkemeya Qanûê Bingeyî zî bire daye ke no qedexe binpaykerdişê heqî yo la reyna zî qedexe dewam keno. Ma nê rejîmê otorîterî qetî do bişawê. Ez pê bawer a ke 14ê gulane ra dima roşa şemeyî ma Galatasaray de çalakîya xo rê dewam bikerê.''

Turkdoganî ard ziwan ke hêzê înan ê vurnayîşî pêt o û vat: ''Pêro partîyî qala Qanûnê Bingeyî yê demokratîkî kenê. Eke ma biwazê ferasetê înkarkerdişê şarî biqedînê û heqanê bingeyînan Meclîs bivisnê destî ganî sey Partîya Çep a Keske Meclîs de bi xurtî cabigêrê. Seba ke Partîya Çep a Keske bibo temînato qanûnî yê heqanê bingeyînan bi hawayêkê xurtî Meclîs de cabigêra. Îtîfaqê Miletî teyna qala restorasyonî keno. La restorasyon bes nîyo. Partîya Çep a Keske do bi komêka xurte ya Meclîsî cuya azade, ekoloj, pawitişê xoza û komelê demokratîkî awan bikera. Ma hêvî kenê ke şarê ma yê Îstanbulî goreyê ney tercîhê xo bikerê.''