Buroyê Huqûqî yê Asrinî derheqê tecrîdê giranî yê vera Rayberê Şarê Kurdî Abdullah Ocalanî de eşkerayîyêka nuştekîye daye.

Eşkerayîye wina ya:

''Birêz Abdullah Ocalanî de pêvînayîşê avûkatan o peyên 7ê tebaxa 2019î de çar serrî verî amebi kerdene. 25ê adara 2021î de ey birayê xo de pê telefonî qisey kerd û telefon nişka ra birîya. A roje ra nata Birêz Ocalanî ra xeberêke nêna girewtene û muracat û xîretê ma zî pê destê dewlete bênetîce mendî

Komîteya Heqanê Merdiman a Neteweyanê Yewbîyayeyan (NY) muracatê ma ser o bire daye ke Birêz Ocalan wa cade bieşko keye û avûkatanê xo bivîno la dewlete na bire zî nêarde ca. Birêz Ocalan 'tarîxê huqûqî' de hetê yew sîstemê îşkenceyî ra tepişîyeno ke yew nimûneyê nê sîstemî yo bîn çin o. 

Birêz Ocalanî ra û tepişteyanê bînan ê Îmraliyî Birêz Veysî Aktaş, Hamîlî Yildirim û Omer Hayrî Konarî ra xeberêke nêna girewtene. No tecrîd/bêtêkilîyêka mutleqe qetî meşrû nîyo/nîya. Eşkera yo ke dewlete çaresernêkerdişê meseleya kurdan de israr kena. No israr zî bingeyê pêro krîz û meseleyan o. Heta ke na raştîya dewlete nêra dîyene vurîyayîş zî mumkîn nîyo.

4 serrî verî Birêz Ocalanî pêvînayîşê xo yê peyênî de îfade kerdbî ke o haştîye de israr keno, meseleya kurdan bi demokrasî çareser bena, o eşkeno mîyanê hewteyêkî de şerî biqedîna û o pê xo bawer o la ganî dewlete zî wina têbigêra. Eke a roje pêşnîyazê çareserîya demokratîke yê Birêz Ocalanî biameyêne caardene ewro nê krîzo ekonomîk, parçebîyayîşê komelî û alozîyê sîyasîyî nêqewimîyayêne. 

Ganî bizanîyo ke ma tewr verêne wazenê ke Birêz Ocalanî û muwekîlanê xo yê bînan ra raşta raşte xeberêke bigêrê. Ma venga pêro selahîyetdaran danê ke peynîya na bêtêkilîyêka mutleqe û îşkenceyî bîyarê. Ma venga rayaumûmîya demokratîke zî danê ke wa derheqê na babete de hîsger biba.''