Rewşa tepişteyê nêweşî Seyfettîn Demhatî bena giran. Keyeyê Demhatî ra Şengule Marti derheqê babete de ANFyî rê qisey kerd.

Şengule Marti da zanayene ke Demhat rixmê nêweşîyanê xo yê krîtîkan zî 9 serrî yo zîndan de tepişîyeno. Şengule vat: ''Nêweşîya kekê  mi FMF bena xirab, pêro bedenî ra vila bîye. Seba ke gurçikê ci bixebitê dermanêk lazim o. La doktorî vato hînî no derman zî kekê mi rê fayde nêkeno. Kekê mi nêeşkeno zîndan de bimano. Îdareyê zîndanê Wanî doktorî ra wazeno ke wa raporê 'eşkeno zîndan de bimano' bido ci.''

Şengule Marti bale ante grevê vêşanîye yê tepişteyan ser û vat: ''Ganî her kes wayîrê grevê vêşanîye vejîyo. Tepişteyê kurdî esîr ê. Ganî ma tepişteyan teyna nêverdê. Tepişteyî wazenê tecrîdê vera Rayberîye biqedo û o vera bidîyo. Sey kekê mi zaf tepişteyî zîndanan de nêweş ê. Ma venga dewlete danê; hînî bes o.''