Tepişteyê dewaya PKK û PAJKî 27ê teşrîna peyêne ya 2023yî ra nata seba azadîya Rayberê Şarê Kurdî Abdullah Ocalanî û çareserîya meseleya kurdan grevê vêşanîye kenê. Xeylêk şaristanan de keye û merdimê tepişteyan zî seba destekê grevî Nobeta Edaletî de yê.

Dadîyanê Nobeta Edaletî ya Amedî derheqê çalakîya xo û Rayraşîyayîşê Azadîye yê Pîlî de ANFyî rê qisey kerd.

Îdarekara Rêxistina DBPyî ya Amedî Muşehere Ulkera ke dadîyan reyde nobete kena vat: ''Ma wazenê Rayber Apoyî ra xeberêke bigêrê. Dadîyî seba ke vengê domananê înan bieşnawîyo û tecrîd wedarîyo tîya de yê. Ganî Wezîrê Edaletî, Serekkomarî û muxatabê bînî vengê dadîyan goşdarî bikerê. Ma azadîya Birêz Ocalanî wazenê. Ewro di baskan ra Rayraşîyayîşê Azadîye yo Pîl yeno kerdene. No rayraşîyayîşê edalet, merdimatîye û haştîye yo. Seba ke dej û şerî biqedê wa tecrîd biqedo. Mela no rayraşîyayîş bibo wesîleya qedîyayîşê tecrîdî. Coka wa her kes paştî bido nê rayraşîyayîşî.''

Sulhîya Saruhana ke lajê ci Zîndanê Tekîrdagî de grev de yo û vat: ''Ma wazenê tecrîd wedarîyo û Birêz Ocalan wa azad bibo. Bi nê tecrîdî komel binê teda de yeno verdayene. Ma sey dadîyan teyna haştîye û edaletî wazenê. Wa her kes vengê ma bieşnawo, wa pêro dadîyê tepişteyan bêrê tîya. 13ê sibate de Rayraşîyayîşê Azadîye yo Pîl do bireso Amedî. No rayraşîyayîş do vengê ma pêroyînan bido eşnawitene. Ez tecrîdî û Komployê 15ê Sibate protesto kena.''