Mazlûm Dag û Abdurrahman Erî Zîndanê Hewlêrî de vera kerdişanê xiraban 18ê gulane de grevê vêşanîye dabi destpêkerdene. Keyeyanê Mazlûm Dag û Abdurrahman Erî bi eşkerayîya çapemenîye pare kerd ke dima ke waştişê domananê înan ameyê caardene înan grevê xo yê vêşanîye qedînayo.

Dadîya Mazlûm Dagî Qudrete Dag eşkerayîye de da zanayene ke ê seba ke weşîya domananê xo ra agahdar bibê şîyê Başûrî û vat: ''Ma kêfweş ê ke grevê vêşanîye qedîyayo. Ma venga selahîyetdaran û şarê kurdî danê ke weşîya domananê ma ser o hîsger bibê û nêverdê ke heqê înan bêrê binpaykerdene.''

Babîyê Erî Şahîn Erî vat: ''65 rojan ra dima rewşa domananê ma hol nîya. Coka ma kêfweş ê ke înan grevê xo qedînayo. Ma rê soz ame dayene ke waştişê înan bêrê caardene. Coka ma pêro sîyasetmedaranê Başûrê rê sipas kenê.''

Apê Mazlûm Dagî Hamît Dagî ard ziwan ke ê bi Heyetê Xoserî yê Heqanê Merdiman û Şêwirmendê Wezîrê Karanê Zereyî de kom bîyê. Hamît Dagî zî seba paştdayîşî sipas kerd.