Dayîka Agît Tûfano ke 1’ê Adare ra nata Zîndanê Bafra yê Tîpê T’yî de vera tecrîdî grevê vêşanîye de yo, Hedîye Tûfane bale ante serê rewşa xoverdayoxanê zîndanî û va, ‘’Ê hinî nêeşkenî payra vinderê, halê înan zaf bîyo giran. Wa na bêhuqûqîye cade biqedîyo.’’

Agît Tûfan 2017 de gama ke hema  domenêk 16 serre bi, bi sebebê xiç eştişê polîsan ameyo tepiştene û îşkenceyê Zîndanê Domanan ê Pozanti ra ravêrto. Tûfan 2010 de ame veradayene û 2011 de reyna bi îdîaya ‘Endamîya rêxistinî’ ame tepiştene û 22 serrî ceza dîyaye ci. Edene û Samsûn de zîndananê cîya cîyayan de mend. Tûfano ke 1’ê Adere ra nata grevê vêşanîye de yo pêvînayîşê keyeyê xo dir ard ziwan ke embazê ê ke grûba verêne ya grevî de yê rewşa înan zaf giran a.

Dayîka Tûfanî Hedîye Tûfane derheqê rewşa lajê xo û embazanê ci de nê pare kerdî: ’’Ê hinî nêeşkenî payra vinderê, halê înan zaf bîyo giran, gonî virêjenê, çîmê înan benê tarî, dewqa înan şina, madeyê înan keweno were. Bêhal ê û xeylî problemê bînî înan de vejîyayî werte. La rixmê naye biqerar ê. Heta waştişê înan nêrê ca ê do çalakîya xo rê dewam bikerê. Dayike Tûfane  ard ziwan ke ê sey dayîkî nêeşkenê rakewe. Zerrîya înan vêşana bena lete û waşt ke waştişê domananê înan cade bêrê bicaardene. Tûfane va ‘’Dayîkî cîya domanê înan cîya xover danê. Hema na bêhuqûqîye çend kena derg? Êdî bes o, wa tecrîd biqedîyo.’’