Delegasyonê Cinîyan ê Mîyanneteweyîyî temasanê xo yê Amed û Îstanbulî ra dima bînaya OHDyî ya Îstanbulî de kombîyayîşêk kerd. Delegasyon 7 cinîyan ra yeno pê.

Avûkatê Buroyê Huqûqî yê Asrinî, Wekîla DEM Partîye Ceylane Akça û xeylêk huqûqnasî tewrê kombîyayîşî bîyî.

Endama Delegasyonê Cinîyan ê Mîyanneteweyîyî Eva Schonveld raporê çimdarîye yê zîyaretanê xo wend û vat: ''Ma zîndanan de tepişteyî zîyaret kerdî, rêxistinê komelê sivîlî û partîyî zîyaret kerdî. Çimdarîyê ma mojnenê ke heqê kurdan Tirkîya de yenê binparkerdene. Ma zîyaretanê xo yê zîndanan de dî ke tecrîdê Îmraliyî vilayê pêro zîndanan bîyo. Heyf ke Tirkîya de îşkence, teda û tecrîd giran benê. Hetê bînî ra tepişteyê sîyasîyî 19 rojî yo seba azadîya Abdullah Ocalanî grevê vêşanîye de yê. Tecrîdê vera Abdullah Ocalanî û hêrişê vera Rojawanê Kurdîstanî zî pabesteyê yewbînan ê. Seba kurdanê Tirkîya ma zaf qerqilîyenê. Tedaya vera komelêkî yena manaya tedaya pêro komelî.''

Rapor de nê waştişî ameyî rêzkerdene:

''-Cade Peymana Îstanbulî bêra îmzakerdene.

-Wa endamê Yewîya Ewropa vera tedaya serê kurdan têbigêrê.

-Hêrişê vera Rojawanî wa cade vinderê, cayê îşxalkerdeyî bêrê xalîkerdene.

-Tecrîdê vera Abdullah Ocalanî wa biqedo, rolê ci yê lîderîya kurdan bişinasîyo û cade Ocalan bêro azadkerdene.

-Tecrîd wedarîyo û pêro tepişteyê sîyasîyî vera bidîyê.

-Wa PKK lîsteya terorî ra bêro vetene.''