Rêxistina DEM Partî ya Dêrsimî bi eşkerayîya çapemenîye startê xebatanê xo yê weçîtinişê cayîyî da. Kirmanckîya eşkerayîye hetê Vervatoxê Komîsyonê Weçînitişî Humeyra Tosun Yegin ra, tirkîya ci zî hetê hemvervatox Ozcan Ateşî ra ame wendene.

Eşkerayîye de ame vîrvîstene ke seba ke verê modelê îdareyê demokratîkî bêro girwtene şaredarîyanê kurdan de qeyûm ame cakerdene û sîyasetmedarê kurdan ameyî tepiştene û ame vatene ke rixmê heme zext û hêrişan şarê kurdî tim wayîrê îradeyê xo vejîyeno û paştî dano partîyanê xo û nê weçînitiş zî de do cewabê tewr ridnî bido rejîmê qeyûman.

Hemvervatoxanê Komîsyonê Weçînitişî bale ante zextanê îqtîdarî ser û  nê vatî: ''Seba ke ma wayîrê kultur, bawerî, xozaya xo bivejîyo ganî ma îdareyê cayîyî xurt bikerê. Badê weçînitişê 14ê gulane  heme rêxistinanê partîya ma de netîceyê weçînitişî ameyî erjnayene û qerar ame girewene ke seba ke şar namzedan bewlî bikero verweçînitiş bêro kerdene.Na çarçewe de bajarê Dêrsim de semedê bewlîkerdişê namzedanê weçînitişê 31ê adare do verweçînitiş bêro kerdene. Ewro ra heta 19ê çeleyê 2024î do muracatê vernamzedeyî dewam bikerê. Kombîyayîşê nasdayîşê vernamzedan do 27ê çeleyê 2024î de bêro kerdene.''

Hemvervatoxanê Komîsyonê Weçînitişî yê DEM Partî yê ke badê eşkerayîye persê rojnamegeran cewab kerdî, vat qezayanê Dêrsimî de pêvînayîşê îtîfaqî dewam kenê.