DEM Partî: Estbîyayîşê rojnamegeranê ke peyê raştîye de yê hêvîya azadî û demokrasîyî ya Tirkîya ya. Roja Rojnamegeranê Ke Xebitîyenê ya 10ê Çeleyî pêro rojnamegeranê ke wayîrê rûmetê rojnamegerîye vejîyenê rê fîraz ba.
Hetkarê Hemserekanê Pêroyî yê DEM Partî yê Çapemenîye û Propaganda ra Berpirsîyar Tayîp Temelî bi wesîleya Roja Rojnamegeranê Ke Xebitîyenê ya 10ê Çeleyî eşkerayîyêke weşanaye.
Eşkerayîye de wina ame vatene: ''Roja Rojnamegeranê Ke Xebitîyenê pêro rojnamegeranê kedkaranê ke seba heqîqatî têkoşîn kenê û nê rayîrî de bedelan danê rê fîraz ba. Ewro heyf ke Tirkîya de na roje manaya xo ra dûrî bîya û bîya roja nêverdayîşê xebitîyayîşê rojnamegeran. Rojnamegerî yenê destbendkerdene, tepiştene û bêkarverdayene. Estbîyayîşê rojnamegeranê ke peyê raştîye de yê hêvîya azadî û demokrasîyî ya Tirkîya ya. Roja Rojnamegeranê Ke Xebitîyenê ya 10ê Çeleyî pêro rojnamegeranê ke wayîrê rûmetê rojnamegerîye vejîyenê rê fîraz ba.''
