DEM Partî seba dîyarkerdişê namzetanê xo yê şaredarîyan Wan, Mêrdîn û şaristananê Serhedî de verweçînayîşan kena.

Wan û şaristananê bînan ê herêma Serhedî de xeylêk merkezan de DEM Partî sindoqî nayî ro. Serhed de qasê 35 hezar kesî do seba 8 şaristanan û 35 qezayan raye bidê. Wan de 13 merkezan de sindoqî ronîyayî û wina pawîyeno ke şaristan de 13 hezar û 500 kesî do raye bidê. Rixmê varayîşê vewre zî şar eleqeyêkê pîlî mojneno û raya xo merkezan de dano. Şar ano ziwan ke ê do namzetanê xo biweçînê û qeyûmî bişawê.

Mêrdîn û qezayanê ci Qoser, Nisêbîn, Dêrik, Artuklu, Stewr, Kerboran û Şemrexî de 10 merkezan de şar rayanê xo dano. Şar serê sibayî ra nata herikîyeno merkezanê verweçînayîşan. Wina pawîyeno ke şaristan de 10 hezar kesî rayanê xo seba dîyarkerdişê namzetan bidê.

Mêrdîn de seba hemşaredarîya şaristanî 13 vernamzetî est ê; Munevvere Olker, Gulizare Îpek Bilek, Necla Fîgen Altındag, Semîre Demirel Kut, Devrim Demir, Ahmet Turk, Abdulvahap Irmak, Azad Yildirim, Nurullah Kiliç, Ziver Gumuş, Nevroz Turk, Şerafettin Şahîn û Nazim Kok

Mêrdîn de adresê merkezanê raydayîşî wina yê:

"* Qoser: Taxa Firatî, Salona Veyveyî ya Dara 

* Nisêbîn: Taxa Kişla, Salona Veyveyî ya Hilltownî

* Artuklu û Rişmîl: Serê rayîrê Amedî, Salona Kombîyayîşî ya Otêla Yay Grandî 

* Dêrîk: Taxa Cevizpinarî, Salona Sporî ya Berdînî 

* Kerboran: Taxa Tepebaşiyî, Parka Ozgurlukî 

* Stewrê: Taxa Tepe, Awîna 

* Şemrex: Taxa Gundoganî, Qewexaneyê Denîzî 

* Mehsert: Taxa Cumhurîyetî, bînaya DEM Partî 

* Mîdyad: Taxa Akçakaya, Salona Kombîyayîşî ya Otêla Turabdînî.''

Merkezê Şirnexî û qezayanê ci Hezex û Silopîya de zî raydayîşî dewam kenê.

Mersîn de zî seba dîyarkerdişê namzetanê Şaredarîya Akdenîzî Salona Veyveyî ya Şahî de rayî dîyenê.