Komîsyonê Polîtîkayanê Komelkîyan û Kede ra Sevtape Akdag Karahali bînaya DEM Partî ya merkezîye de derheqê pêvînayîşanê budçe yê Meclîsî de kombîyayîşê çapemenîye serûber kerd.

Sevtape Akdag Karahali vat: ''Şer, zeman û krîzê ekonomîkî ra rewşa hemwelatîyan her ke şino bena xirabêr. Ewro welat de 18 mîlyon 821 kesî binê meaşê asgarîyî de meaş gênê. Heyf ke sînorê xizanîye bîyo 50 hezar lîra. Coka ganî meaşo asgarî tewr tay 25 hezar bibo. Ganî her hîrê mengan de yew zî meaşî bêrê zêdekerdene.

Welatî pêro çimeyê xo seba şer û çekan xerc kerdî. Îqtîdarê AKPyî seba ke wazeno meseleya kurdan bi şerî hal bikero pêro polîtîkayanê sîyasî û ekonomîkan nê armancî ser o awan keno. Nê polîtîkayanê îqtîdarî ra kedkar û karkerî her roje hîna zaf benê xizan. Ganî budçe şerî rê ney şarî rê bêra xerckerdene.

Ganî Komîsyonê Tesbîtkerdişê Meaşê Asgarîyî bêro wedaritene. Ganî heqê grevî yê karkeran bi qanûnan bêro pawitene. Ganî seba merdimanê ke bi meaşê asgarîyî xebitîyenê awe, ceyran û gazo tabî bêpere bibê. Ganî meaşê cinî û camêrdan têdûşt bibê, heqê cinîyan nêrê werdene. Ganî dewlete pêro xizmetan bi ziwanê dayîke û bê pereyî. Wa çimeyî seba şerî ney seba îhtîyacanê şarî bêrê ercnayene.''