Wekîlanê Partîya Demokrasîyî û Têdûştîye ya Şaran (DEM Partî) tecrîdê vera Rayberê Şarê Kurdî Abdullah Ocalanî vist rojdem û venga komîsyonê Meclîsî da ke cade kom bibo. Wekîlan bi nê armancî muracatê Komîsyonê Cêrînî yê Cigêrayîşê Heqanê Tepişteyan û Hukmwerdeyan ê Meclîsî kerd.

Muracat de ame waştene ke wa cade Îmrali de Rayberê Şarê Kurdî de pêvînayîş bêro kerdene. Muracat de ame îfadekerdene ke tecrîdê Îmraliyî îşkence yo ke îşkence goreyê Qanûnê Bingeyîyî û peymananê mîyanneteweyîyan qedexe yo.

Muracat de ame vatene ke eke îşkence dewam bikero û komîsyon erkê xo nêaro ca no do bêro manaya tesdîqkerdişê îşkenceyî.

Muracat de ame vîrvistene ke Komîteya Heqanê Merdiman a Neteweyanê Yewbîyayeyan sîstemê Îmraliyî sey sîstemê îşkenceyî pênase kerdbi û waştbi ke no sîstem bêro wedaritene.

Wekîlan muracatê xo de qaşt ke şert û mercê Îmraliyî goreyê heqanê merdiman bêrê kerdene.