Roniştişê Dewaya Kobanê ke derheqê 108 kesan de ameya akerdene û înan ra 18 kesî tepişte yenê muhakemekerdene, salona Kampusê Zîndanê Sincanî de ame kerdene.

Roniştişo ke hetê Mehkemeya Ceza Girana ya 22ine ya Anqara ra yeno kerdene Wekîlê DEM Partî, avûkatê OHDyî, Hemserekê Pêroyî yê KESKî Mehmet Bozgeyîk û xeylêk temsîlkarê partîyanê sîyasîyan û dezgehanê komelê sîvîlî tewrê ci bîyî.

Sîyasetmedaranê tepişteyan ra Sebahate Tuncel, Aynure Aşan, Gunay Kubilay, Bulent Parmaksiz, Alî Urkut û Nazmî Gur tewrê roniştişî bîyî. Tepişteyê ke zîndananê cîya cîyayan de yê ê  zî bi  Sîstemê Resnayîşê Veng û Dîmenî (SEGBÎS) tewrê roniştişî bîyî.

Hemserekê Pêroyî yê HDPyî yo verên Selahattîn Demîrtaşî serweşîyî qebul kerdî û pêrune rê spas kerd û vat, ''Ez xopawitişê xo dîyarîya  babayê xo westa Tahîrî yo ke wendiş û nuştişê ci çînêbi û bi ereqê çareyê xo 7 domanî kerdî pîl û heme  dadîyan û babîyan kena.''

Demîrtaşî nê vatî:

"Xoza de têna jîhatî payra manenê. Kulturo ke ma îcad kerdbi ho ça? Sebi ehleq û fezîletî? Goreyê kulturî ma heqdar ê. Dewleta ke şima û ez tede yê, welatê ma bizorî îşxal kerd. Dewlete pêkerdişê fezîletîye  xeripna yo, eke tîya şima gêrenê sûcdarêkî o ma nîyê, ma mexdûr ê.

 (...)  Keso ke semedê dîn û bawerîye yewbîn nêbirna nêmend. DAÎŞî ra bipersê derheqê îslamî de çi zano. Ya zî grûbê ke semedê lînçî vejîyenê kuçeyan, şinê verê merkezê ma yê pêroyî de tewreyo çeqere verdenê, înan ra bipersê ê çiqas dîn û nasnameyî ra fam kenê. Hayîya înan pê çîn a. Ê têna xo kenê mird û neslê xo danê domnayene. Nê Homo Sapiens ê. Eleqeya înan bi kulturî çîn a. Eke pêkerdişê fezîletîye xeripîyayo hinî îmkanê yewca de ciwîyayîşî çîn o ke ma o nêxeripna.

Ma têna  namûs û nasnameyê şarê xo pawit, heqê herra xo se sey însanî ciwîyayîşî pawit. Welat ê ma yo, herre ya ma ya, kede yê ma ya. Ma Anqara îşxal kerde? Ma ameyê ûca ziwan, kultur û bawerîya şarî qedexe kerd? Tirkî vera îşxalî vejîyayî? Yunanijî, îngîlîzî û bizansijî est bî, tirkan vera înan xover da. Qey gama ke kurdî xover danê benê terorîst?

Derbeya 80î bi heme dezgeh û sazîyan û zîhnîyetê xo dewam kena. Ma xover danê, zîndan de xover danê, parlemento de xover danê. Xoverdayîşê vera zulmî heqdar o, meşrû yo. Ma do xover bidê. Ti şewe û roje semedê Gazze vengdayîşê xoverdayîşî kenê. Vengdayîşê xîlafetî kenê. Qey o sûc nîyo , qey waştişê ma yê xoserîye sûc o! 

Têna yew rayîrê çareserkerdişê meseleya kurdan est o,  kurdî ganî sey kurdan bêrê qebulkerdene. Ma sey kurdan milê xo çewt nêkenê. Ma wazenê pîya bicîwî yê la vera nê zîhnîyetî ma do heta peynî xover bidê." 

Roniştiş do siba saete 10:00 de bi xopawitişê Demîrtaşî dewam bikero.