Leyla Yildiztan (Denîze Firat) 1984 de dewa Xecîxatune ya qezaya Çaldiranî ya Wanî de dadîya xo ra bîya. Seba ke dewa ci nêzdîyê sînorê Îranî de bîya keyeyê ci tim bîyêne hedefê hêrişan. Coka keyeyê Leyla 1990 de koçê şaristanê Ûrmîye yê Rojhelatê Kurdîstanî kerd û wextêk Xakurkê de mend.

1991-1992 de Denîze Xakurkê de bîye şahîda hêrişanê dewleta tirke û hemkarîya PDKyî ya bi dişmenî. A binê tesîrê şehadetê Bêrîtane (Gulnaze Karataş) de mende. A û waya xo Sarya (Sakîne Yildiztan) bire danê ke tewrê gerîlayan bibê. Waya aye Binewşe (Ayfere) zî 1997 de Zap de şehîd bibî. 8ê tebaxa 1999î de Sarya şehîd bîye. Denîze bi xurtî tewra têkoşînê gerîlayan bena û 2007 de mîyanê karanê çapemenîye de cagêna.

A kovara 'Xwedawend Zîlan' de dest bi karê çapemenîye kena û Radyoya Dengê Welatî de xebitîyena. Dima Kampa Mexmûrî de rojnameyê 'Rojeva Welat' de xebitîyena. A sey rojnamegerêke hêrişanê DAÎŞî yê vera Mexmûrî teqîb kena û 8ê tebaxa 2014î de nê hêrişan de şehîd bena.

Embaza ci ya têkoşînî Cîhane Murad qalê Denîze ANFyî rê kerd.

Cîhane ard ziwan ke aye Faraşîn de Denîze Fiart şinasnaya û vat: ''A serre Rayber Apoyî amebi esîrkerdene û operasyonî zaf bîyî. O çax embaze Denîze 15-16 serre bîye. La Başûr de gerîlatîye kerdêne. Embaze Denîze milîtanêka cinîye bîya ke bi zerrînizmî û fedakarî şinasîyayêne. Denîze hem şer de hem zî mîyanê cuye de serkêşe bîye. A dima ke tewra gerîlayan bîye wendiş û nuştiş musaye. Aye tim rojnuşteyêk nuştêne. Embaze Denîze xoaverberdişî de sînorî nêşinasnayêne. 

Kampa Mexmûrî de şarî aye ra zaf hes kerdêne. Embaze Denîze şar de têkilîyêka xurte ronayêne. A her çîyê şarî de eleqedar bîyêne. Kampe de a bi xurtî tewra karanê rojname, televîzyon û ajansî bîye. Aye xebatê Kovara Xwedawend û Radyoya Dengê Welatî kerdî û Mexmûr de zî karê xo domînayî. 

Wexto ke 6ê tebaxa 2014î de DAÎŞî hêrişê Kampa Mexmûrî kerd cinî û domanî kampe ra ameyî vatene. Hêrişan de di warê Denîze şehîd bîyî. Embazan waşt ke wa Denîze kampe ra şora. La Denîze no qebul nêkerd û kampe de mende. Aye şer, cuye û rojnamegerîya şorişgêre ra tawîz nêda. 8ê tebaxe de şerêko giran qewimîya. Embaze Denîze bi giranî birîndar bîye, wedarîyaye Nêweşxaneyê Hewlêrî la rixmê xîretan zî şehîd bîye.

Pêro cuya Denîze bi têkoşînî derbaz bîye. Aye sey hunermendêka ruhî û zerrîye embazê xo hîs kerdêne. Aye qetî kesayet û têkoşînê xo ra tawîz nêda.''