Roniştişê dewaya hemserekê Pêroyî yê HDPyî yo verên Selahattîn Demîrtaşî yo ke sey rehînî yeno tepiştene, Kampûsê Zîndanê Sîncanî de dest pêkerd.

 Roniştişo ke Mehkemeya Cezaya Girane ya 19ine ya Enqere de yena viraştene, 31 fezlekeyan ra yena ra.

Polîsan destûr nêda heyetê mîyanneteweyî û xeylî kesê bînan ke tewrê roniştişî bibî. Reyna destûr rojnamegeran rê zî nêdîya.

Demîrtaşî  seba bale antişê muhîmîya ziwanî bi kurdkî dest bi xopawitişê xo kerd û  hêver hemsereka KCDyî û parlamentera HDPyî ya Colemêrgî Leyla Guvena ke semedê wedartişê tecrîdê serê Ocalanî 35 rojî yo grevê vêşanîye de ya, a silam kerd û tecrîdê serê Rayberê Şarê Kurdî Abdullah Ocalanî rexne kerd.

Demîrtaşî nê vatî:  ‘‘Şima sey heyetê mehkemeyî karê xo bêhet û xoser  bica nêanî. Coka ganî şima nê karî ra xo pêser biancî.  Şima bi tweetanê hesabêkê sexteyî ez tewqîf kerda û hem zî  nê bi destê endamanê cimatî ke ewro sey sûcdarî yenî zanayene, ameyî hadrekerdene.‘‘

Dermîrtaşî qerarê Mehkemeya Heqanê Merdiman a Ewropa (MHME) yo ke semedê serbestveradayîşê ey amebi girewtene zî ercna. Demîrtaşî wina va: ‘‘  Huqûq goreyê waştişê hukmatî yeno bicaardene. Bi hîleyan û bêhuqûqîye yeno waştene ke vernîya ma bigêrîyo. La ez reyna vana; o ke paştê xo dano qralî do bikewo. Na dinya Sultan Silêmanî rê nêmenda Erdoganî rê manena?‘‘

Dermîrtaşî wina dewam kerd: ‘‘Ez bêrî 90 serran zî ez do şima ra tehlîye mewazî. Şima ez nêtepişta. Ez tîya de rehîneyêko sîyasî ya. Coka tehlîyeya xo nêwazena.‘‘

Roniştişê mehkemeye do 3 rojî dewam bikero.