Çewlîg, Dêrsim û Amed de coşê Partîya Çep a Keske dewam keno. Namzetê Partîya Çep a Keske hîrê şaristanan de zî şarî reyde ameyî têhet.

Dêrsim

Namzeta Dêrsimî ya Partîya Çep a Keske Aytene Kordu, dezgehê Îtîfaqê Kede û Azadîye û Wekîlê HDPyî yê Dêrsimî Alîcan Onluyî qezaya Mazgêrdî ya Dêrsimî de esnafî zîyaret kerdî. Aytene Kordu tîya de qisey kerd û vat: ''Ma do rejîmê tekmerdimî birijnê û demokrasîyêke awan bikerê ke merdimî tede bi ziwan, bawerî û nasnameyê xo do biciwîyê. Ma do meseleyanê şarê xo, bi hawayêkê xurtêrî Meclîs de bîyarê ziwanî. ''

Dima heyetî buroyê xo yê weçînayîşî akerd û govende girewte.

Çewlîg

Namzetanê Çewlîgî yê Partîya Çep a Keske Cemîle Turhalli Balsak, Omer Faruk Hulaku û Faruk Arisî kedkaranê çapemenîye reyde fitar kerd û dima nînan de kombîyayîş kerd. Kombîyayîş de namzetan derheqê weçînayîşan de qisey kerd û agahîyî dayî înan. 

https://twitter.com/CemileTurhalli/status/1648746942493540358?cxt=HHwWjIC2_fqmw-EtAAAA

Amed

Partîya Çep a Keske bi beşdarîya namzetanê xo Serhat Eren, Mehmet Kamaç, Adalete Kaya qezaya Karazî de buroyê weçînayîşî akerd. Hemwelatîyan bi coşî heyetî pêşwazî kerd. Heyetî tîya de buroyê weçînayîşî akerd. 

Qezaya Hêniyî de bi beşdarîya namzete Halîde Turkoglu û xeylêk kesan buroyê weçînayîşî ame akerdene. Şarî akerdiş de tim sloganê “Jin, jiyan, azadî” û “Bijî Serok Apo” vatî.

Qezaya Pîranî de zîyaretê goristanan ra dima xebatê weçînayîşî ameyî kerdene. Heyeto ke waşt ke şoro Goristanê Pîrejmanî hetê cendirmeyan ra ame astengkerdene. Dima heyetî goristanî zîyaret kerdî. Wekîlê HDPyî Hişyar Ozsoyî tîya de qisey kerd û sere de Şêx Seîd pêro şehîdî yad kerdî. Ozsoyî îfade kerd ke xoverdayîşê şaran vera zulmî dewam keno û şar weçînayîşan de do cewabî bido îqtîdarî.