Dewleta tirke dewa Bilbêsî ya qezaya Elkê ya Şirnexî de 29ê temmuze de tebervejîyayîşî qedexe kerdbi. 4ê tebaxe de qedexe bi hawayêkê resmî qedîya zî bi hawayêkê fîîlî dewam keno.

Dewe de 1ê tebaxe de sereştişan de dewij Îzzettîn Cîn amebi destbendkerdene û 3yê tebaxe de zî tepişîyabi.

13 rojî yo ablûqaya leşkeran ra destûr nêdîyeno ke şar şoro bax û baxçeyanê xo.

Dewe qasê 24 saetî yo pê teyarayanê F-16î û helîkopteran dîyena bombayan ver.

Ewro 10ê tebaxe de, serê sibayî xeylêk cayanê dewe rê leşker, polîsî û tankî ameyî sewqkerdene.

Warê daristanan ê dewe ra vengê çekan yenê. Dîya zanayene ke herême de pêkewtişî qewimîyenê.

Dewijan ard ziwan ke leşkerî nêverdenê ê şorê teberî û waşt ke wa heyetêkê pawitoxanê heqanê merdiman û sîyasetmedaran şorê herême.