Rayberê Şarê Kurdî Abdullah Ocalan û Omer Hayrî Konar, Hamili Yildirim û Veysî Aktaşî yê ke Îmrali de yenê tepiştene înan ra hîrê serrî yo qet xeberêke nîna girewtene. Dezgehanê heq û huqûqî vera tecrîdê Îmraliyî muracatê CPTyî kerd.

Muracat de ke hetê baroyanê Amed, Êlih, Mêrdîn, Mûş, Şirnex, Riha û Wanî, Sîstemê Ceza Înfazî de Komeleya Komelê Sîvîlî, Komeleya Huqûqnasanê Hemdemî, Komeleya Heqanê Merdiman, Komeleya Huqûqnasan a Seba Azadîye, Weqfê Cigêrayîşê Huqûq û Komelî ra ame kerdene, nê ameyî vatene:

"Yeno zanayene ke komîteya şima 1999î ra nata 11 rey Zîndanê Îmraliyî zîyaret kerd. Heta ewro têna mekanîzmaya mîyanneteweyîye ya ke Îmrali zîyaret kerd, komîteya şima ya. Eynî wextî de komîteya şima şahîda ke 24  serran ra zafêr o Îmrali de rewşe senî xirab a. Şima raporê xo yê 2022yî eşkera nêkerd. Rixmo ke binpaykerdişê heqanê ke şima tesbît kerdî Tirkîya nê wenêdaritî şima vera Tirkîya çîyêk nêkerd, nê zî paştî daye Tirkîya.

Komîteya şima tewr peynî de raporê xo yê 2020 eşkera kerdbi. A roje ra nata Îmrali de çîyêk nêbedilya. Rewşa  'incommunicado' (bêtekîlîya qetî)  çend şino giranêr bena. 2019î ra nata pêvînayîşê avûkatan nêameyî kerdene. Adara 2021î de pêvînayîşê telefonî yê 3 deqayan ame kerdene û a roje ra nata qet xeberêke nêameye girewene. Rewşa winayêne de ganî komîteya şima  vera îşkenceyî goreyê Madeyê 10/2. yê Vergirewtişê Îşkenceyî yê Pêkerdişê Ewropa têbigêro. Ma sey dezgehanê heq û huqûqî veng danê şima ke vera rewşa xirabe ya Îmraliyî bêvengê memanê. Vera rewşa incommunicadoyî ke giranêr bena, wezîveyê xo bîyare ca  û şirê Tirkîya ser ke wa tecrîd bêro wedaritene.''

Muracat de semedê pêvînayîşê Îmraliyî sey 8 madeyan waştişê dezgehanê heq û huqûqî ameyî rêzkerdene.