Wezîrîya Edaletî ya Tirkîya bahaneya ke derheqê tecrîdê Îmraliyî de pêşkêşê Mehkemeya Qanûnê Bingeyî kerdbî, tede îdîa kerd ke ''kerdişo xirab'' çin o û tay sebeban ra ke destê înan de nîyê pêvînayîş nêameyê kerdene.
2 serrî yo Rayberê Şarê Kurdî Abdullah Ocalanî ra xeberêke nêna girewtene. Tewr peyên 25ê adara 2021î de birayê ey Mehmet Ocalan, tede telefon de qisey kerdbi la tefefon cade birîyabi. Hetê bînî ra tepişteyanê bînan ê Îmraliyî Yildirim, Veysî Aktaş û Omer Hayrî Konarî zî xebere nêna girewtene.
Pêvînayîşî bi hawayêkê keyfî û sîstematîkî yenê astengkerdene, cezayê dîsîplînî zî bi hawayêkê ereyî avûkatan rê yenê vatene.
Avûkatan muracatê Mehkemeya Qanûnê Bingeyî (AYM) kerd û dîyar kerd ke bi taybetî 2021î ra nata tecrîd yeno girankerdene coka muwekîlê înan raştê kerdişanê xiraban yenê. 8 serranê peyênan de Buroyê Huqûqî yê Asrinî bi desan reyî muracatê AYMyî kerdo.
Goreyê xebera Ajansê Mezopotamya, AYMyî nê muracatan ra derheqê qasê 23ê înan de Wezîrîya Edaletî ra fikr waşto.
Wezîrîye derheqê qedexeyanê pêvînayîşan, cezayanê dîsîplînî, OHAL ûsn de fikrê xo pêşkêşê AYMyî kerdî. Ame parekerdene ke AYMyî derheqê 23 dosyayan de Buroyê Huqûqî yê Asrinî ra fikr waşto.
Ame îdîakerdene ke Wezîrîye cewabê xo de vato ke 'kerdişêko xirab Îmrali de çin o.' Wezîrîye îdîa kerd ke tay sebeban ra ke destê înan de nîyê pêvînayîş nêameyê kerdene.
Avûkatanê Buroyê Asrinî heta 18ê nîsane derheqê 23 dosyayan de fikrê xo dîyar kerd û înan bale ante ser ke astengkerdişê pêvînayîşan îşkence û binpaykerdişê heqan o. Avûkatan da zanayene ke çarçewa qanûnanê neteweyîyan û mîyanneteweyîyan de ganî Ocalan bieşko keye û avûkatanê xo bivîno.
