Sere de Êlih, Licê, Erxenî, Farqîn û Norşîn hetê îqtîdarê AKPyî ra roja dişemeyî dest nîya 8 şaredarîyanê HDPyî ser. Wekîlê HDPyî yê Şirnexî Huseyîn Kaçmazî derheqê babete de ANFyî reyde qisey kerd.

Kaçmazî vat: ''Polîtîkayê redî, înkarî, asîmîlasyonî û çinkerdişî dewam kenê. Wexto ke merdim bala xo dano tarîxê Tirkîya ser vîneno ke Mufetîşê Umûmî, Planê Şark-Islahatî, qanûnê Takrîrî Sukunî, Rewşa Îstîsnayîye, vêşnayîş û vengkerdişê dewan pêro netîceyê nênaskerdişê estbîyayîşê kurdan û polîtîkayê asîmîlasyonî yê. Serebûtê ke dewirê AKPyî de qewimîyenî nîşanê ma danê ke Hîşmendîya tekpereste qet estbîyayîş û îradeyê kurdan nas nêkerdî. Wextêkê winasênî de ke pêro dinya vera vîrusê Korona têkoşîn danê heyf ke îqtîdarê AKPyî hêrişê şarê kurdî û îradeyê înan keno. Dinya zî birijîyo AKP dişmenîya kurdan kena.''

Kaçmazî bale ante paketa dadgerîye ser û vat: ''Dizdî, rotoxê kundoxan, cergî, mafya eşkenê pakete ra fayde bivînê la şarê kurdî, merdimê çepgirî û sosyalîstî yanî 10 hezar muxalîfî nêeşkenê tira fayde bivîne. AKP bi nê hawayî dişmenîya xo ya ver kurdan mojneno. Na pakete vera huqûqî, exlaqî û şertê têdûştîye yê Qanûnê Bingeyîyî ya. Nê welatî de têna HDP muxalefetê komelkî keno. AKP keno ke bi rayîrê neteperwerîye payan ser bimano. Partîya ma wazena otorîteya AKPyî asteng bikera coka AKP xîret keno ke bi hêrişan verê HDPyî bigêro. La ma komara demokratîke û neteweyê demokratîkî de isrardar ê. Ma do ser bikewê û înan ra hesab bipersê.''