Yewîya Rojnamegeranê Almanan (DJV) venga kedkaranê medya da ke xo Tirkîya ra dûrî bigêrê. Yewîye vera tepişîyayîşê Wekîla Partîya Çepe Gokaye Akbulut nêrazîbîyayîşê xo mojna.

Serekê DJVyî Frank Uberallî vist vîrî ke Wekîla Partîya Çep a Keske Gokaye Akbulut destpêkê tebaxe de Tirkîya de tepişîyabî û vat: ''Otokrasîya Erdoanî reyna xo mojna ke êyê ke Erdoganî rexne kenê sey dişmenê dewlete hesibîyenê û  zulmê nînan yeno kerdene. Eke ma nêeşkenê verê tepişîyayîşê wekîlêke bigêrê o çax tehlukeyê vera rojnamegeran hîna pîlêr o.''

Uberallî dîyar kerd ke rojnamegerê ke derheqê Tirkîya, Erdogan û îqtîdarê AKPyî de xebere yan zî şiroveyê rexneyî kenê wa xo Tirkîya ra dûrî bigêrê.