Nêweşîya SMA nêweşîyêka winayên a ke bi taybetî pitan de dîyena û eke nêra dermankerdene bena sebebê mergî. Seba ke dermanê nêweşîya SMA Zolgensma hetê dewlete ra nêno dayene keyeyê domananê nêweşan neçare manenê ke kampanya serûber bikerê. 

Nîjadperestîya Tirkîya kampanyayanê SMA de zî xo mojnena ra. Kampanyayê domananê tirkan cade qedîyenê la kampanyayê domananê kurdan tewr tay di serran dewam kenê. Prosesê nê di serran de xeylêk domanî dinyaya xo bedilnenê.

Fatma Betul Anuştekîn qezaya Pasurî ya Amedî ra ya. Fatma Betul nêweşa SMA ya û heta nika hîrê reyî kampanyaya ci hetê walîtîye ra ameya betalkerdene. Ganî verî ke biba di serre Fatma Betul bêra dermankerdene. Babîyê Fatma Betul Kirgizîstan de xebitîyeno, dadîya aye ewnîyena tira. Fatma Betul wextê pandemî de 2 reyî Korona bîya û 9 mengan servîsê ciewnîyayîşê giranî de menda.

Dadîya aye Ayşe Anuştekîn ard ziwan ke wexto ke medyaya dîjîtale de wextê kampanyaya ardimî de deyîrê bi kurdkî, qiseykerdişê bi kurdkî yenê kerdene tayênî hînî ardim nêkenê.

Zerrîwazanê kampanyayanê SMA ra Onur Saglayî ard ziwan ke kampanyayî seba domananê kurdan erey qedîyenê û merdimî wexto ke wazenê ardimî bikerê ewnîyenê neteweya domanan ra.

Saglayî îfade kerd ke wexto ke înan seba pitê şirnexijî Efnanî kampanya kerdêne tay kesan vato ''Eke domanê tirkî bîyêne ma hetkarîye kerdêne, ma rê domananê tirkan bîyarê, ma çira hetkarîya kurdan bikerê.''

Saglayî da zanayene ke kampanyayê seba domananê tirkan tewr zaf 6 mengan de qedîyenê la kampanyayê seba domananê kurdan qasê hîrê serran dewam kenê û ê prosesî de domanê kurdî dinyaya xo bedilnenê. Saglayî pê hesna ke walîtîyî zî seba kampanyayanê domananê tirkan pêro destûran danê la kampanyayanê domananê kurdan asteng kenê.

Saglayî venga dezgeh û merdimanê karî yê kurdan da ke hetkarîya domananê nêweşanê SMA bikerê.