Xeylêk pisporî vanê ke tebdîrê Tirkîya yê vera vîrusê Korona kêm ê. Nê wextî de ke felaket verê berî de yo, karo ke ganî destpêk de bi lezî bêro kerdene no yo ke 15 hezar kedkarê weşîye yê ke Rewşa Îstîsnayîye de bi qerarname wezîfe ra ameybî girewtene newe ra tewrê karî bêrê kerdene. Labelê her çiqas pê nê personelan hewcedarîye esta zî hukmatî hema derheqê babete de gamêke nêeşte.

Wekîlê HDPyî yê Kocaelî Omer Faruk Gergerlîogluyî derheqê babete de wina qisey kerd: ''Ma bi serran o ke babeta qerarnameyî anê rojdem. La pê pandemî eşkera bi ke babete çiqas girîng a. Tirkîya de kêmasîya xebatkaranê weşîye esta. 15 hezar kedkarê weşîye karî ra ameyî dûrvistene.

Mîyanê nê kesan de doktorê zaf bitecrube û zanyarî zî estê. Înan ra tay kesî zî zîndan de tepişte yê. Herinda ke cuya merdiman bixelisnê zîndan de yenê tepiştene. Ganî 15 hezar kedkarê weşîye cade tewrê karî bêrê kerdene. 

Hukmat hesabê sîyasîyî keno ke no zî berê felaketan akeno. No sûcêko merdimîye zî. Çunke na mesele hînî ewro pêro dinya eleqedar kena. Biverdê wa nê merdimî seba merdimîye bixebitê. Wextêkê winasênî de hewceyê merdiman b, xizmet û zanayîşan esto. Dûrvistişê 15 hezar kedkaranê weşîye tewirêko ke ganî bêro hukmkerdene. Eke siba bîr merdimî bimirê teqez hesabê ci do bêro persayene.''