Dr. Yildirim: Beno ke zîndanî bivurîyê cayê mergî
Dr. Kamûran Yildirimî ard ziwan ke Covid-19 seba tepişteyanê sîyasîyan rîskêko pîl o û vat: ''Eke ê uca de bêrê vindertene zîndanî do bivurê cayê mergî.''
Dr. Kamûran Yildirimî ard ziwan ke Covid-19 seba tepişteyanê sîyasîyan rîskêko pîl o û vat: ''Eke ê uca de bêrê vindertene zîndanî do bivurê cayê mergî.''
Pandemîya vîrusê Korona (Covid-19) lez vila beno la zîndananê Tirkîya de seba teppişteyanê sîyasîyan hema zî tebdîr nêame girewtene. Merdimê tepişte û hukmwerdeyan bêmabên venga rejîmê AKP-MHPyî kenê ke tepişte û hukmwerdeyî bêrê veradayene.
Bi taybetî merdimî pê peygoşîya dezgehanê dewlete ya vera tepişteyanê nêweşan qayîl nîyê. Tepişteyanê sîyasîyan ra yewe zî wekîla verêne ya HDPyî Gulsere Yildirim a ke 4ê teşrîna peyêna 2016î ra nata Zîndanê Kandira de tepişte ya. Mêrdeyê ci Dr. Kamûran Yildirim rewşa cinîya xo ser o ANFyî reyde qisey kerd. Serekê verênî yê Odaya Tabîban a Mêrdînî Dr. Kamûran Yildirimo ke nika wezîfeyê Serekîya Baskê Hekîman ê Pratîsyenan ê Yewîyanê Tabîban ê Tirkan kenı, vist vîrî ke cinîya ey 3 rey wekîlîya Mêrdinî kerde. Dr. Yildirimî ard ziwan ke cinîya ci rîxmo ke cezaya ci nêameye qetîkerdene 4 serran ra nata Zîndanê Kandira de yena tepiştene.
Dr. Kamûran bale ante pandemîya Covid-19 ser û vat: ''No vîrus beno ke bibo semedê mergê xeylêk merdiman. Cuya merdiman zîndan de binê rîskî de ya. Semedo ke şert û mercê zîndanan hol nîyê rewşa nînan bitehluke yê. Ganî prosesê hukmkerdişê tepişteyan teber de dewam bikero. Xora cezaya cinîya mi tewr zêdêr do 9 serrî biba û ganî nika teber de biba. Ez sey merdimêkê tepişteyêke wazena venga Meclîsî, Birêz Serekkomarî û Wezîrê Edaletî û rayedaran bida ke wezîfeyê xo bîyarê ca û metodêk peyda bikerê ke tepişteyê sîyasîyî bivejîyê teber. Eke tepişteyî zîndanan de bêrê vindertene ê cayî do bibê cayê mergî. Berpirsîyarîya naye zî giran a. Eke tepişteyan rê zerarêk bireso ma do cade hesabê naye bipersê.Ganî ma bi aqilane têbigêrê. Ez venga şarê xo zî dana ke sûcê nê merdiman têna wayîrvejîyayîşê veng û îradeyê şima yo. Bedelê ci bidê. Ganî ma bêveng nêmanê.''