Parlamentera HDPyî ya Mêrdînî Pero Dundare derheqê çîyê ke goristan û cenazeyan rê yenî kerdene de qisey kerde û wina va: “Bitaybetî serranê peyênan de îşkenceyê cenaze û goristanan yeno kerdene û no zî nîşan dano ke vera kurdan de huqûqê dişmenî esto.”
Awanbîyayîşê dewleta tirkî ra nata peynîya sucanê şerî yê dewleta tirkî nîna. Bitaybetî Qetlîamê Dêrsimî de îşkenceyo ke bi cenazeyan amebi kerdene, hîna hişê ma de yo. Reyna kesê ke serranê 90î de ameybî qetil kerdene, dozê înan kirişîyabi AÎHMî. Çend serranê peyênan de Gimgim, Cizîr, Sûr, Nisêbîn û sewbîna xeylê cayan de cenazeyî ameyî parçe kerdene, erdî ra ameyî kirancene, destûr nêdîya bêrî defin kerdene û sewbîna. Tewr peynî hepsîyo nêweş Koçer Ozdal ke zîndan de merd, definkerdişê cenazeya ci de astengî ameye vetene.
ÎŞKENCEYÊ KE BI CENAZEYAN YENÎ KERDENE
Parlamentera HDPyî ya Mêrdînî Pero Dundare babete ser o qisey kerde û dîyar kerde ke nêyî bi hawayo zanaye yenî kerdene. Dundare va ‘ti bawerî de çîyê winasî nînî kerdene’ û wina domnaye: “Goreyê bawerîya Îslamî; kam kura de bimiro, ganî ewja de bêro defin kerdene. Dewleta tirkî îşkence bi cenazeyan kerde, pey panzeran ra kirantî, teşhîr kerdî û sewbîna xeylê çîyê bînî ameyî kerdene. Ê nêyî ra zewq gênî. Wazenî kurdan ra vajî ‘eke ti bimirî, ez to mezel de zî rehet nêverdana’. Bi no qeyde hewl danî kurdan teslîm bigîrî.”
KEYEYÎ DOMANANÊ XO NÊŞINASNENÎ
Dundare qiseykerdişê xo de qala cenazeyê ke morgan de yî kerde û wina va: “Kesê ke cêrzemînanê Cizîrî de ameyî qetil kerdene, hîna zî cenazeyê înan nêdîyayî keyeyanê înan. Keyeyî nêşênî cenazeyanê xo bigîrî. Cenazeyê ke yenî girewtene, parçeyê înan kêmî yî. Keyeyî nêşênî domananê xo bişinasnî. Îşkence tena bi cenazeyan nîno kerdene. Serranê peyênan de goristanî zî yenî bombe kerdene. Ganî dezgeyê heqê merdiman nînan qebul nêkerî. Labelê komelê Tirkîya ker û lal o.”
WAZENÎ KURDAN BÊVENG BIKERÎ
Dundare peynîya qiseykerdişê xo de va ‘kurdî goreyê heqê merdiman têkoşîn danî’ û wina domna: “Ewro tena kurdî wayîrê heqê merdiman vejîyenî. Reyna tena kurdî wayîrê demokrasîya nê welatî vejîyenî û wazenî ke wa huqûq bikewo dewre. Cok ra wazenî kurdan bêveng bikerî. Sebebê çîyê ke vera cenaze û goristanan de yenî kerdene, no yo. Kurdan ra vanî ‘yan şima bêveng benî û teslîm benî, neke ez vera şima de bi huqûqê dişmenî têgêrena.”
