Namzedê Partîya Çep a Keske yê Colemêrgî û Avûkat Onur Duşunmezî derheqê xebatanê weçînayîşî de ANFyî rê qisey kerd.

Onur Duşunmezî ard ziwan ke Vakurê Kurdîstan de Qanûno Bingeyî nêno caardene û îqtîdar cîyakerîye keno. Duşunmezî vat: ''Naye ra ez Meclîsî bikera warê têkoşînî. Weçînayîşê 14ê gulane do bibê weçînayîşê rijnayîşê blokê faşîstî. Bi destê dewlete şarê Colemêrgî rê tedayêka pîle yena kerdene. Seba ke biba vengê şarî ez wazena şora Meclîsî. Şarê ma weçînayîşê verî de 2 wekîlî vetbî la seba ke wekîlêkê ma ame tepiştene teyna wekîlê ma Saît Dede mendbi. Ma armanc kenê ke tewr tay 100 wekîlan bişawê Meclîsî û nê perspektîfî ser o têgêrenê.''

Duşunmezî îfade kerd ke ganî Partîya Çep a Keske giranîye bida tecrîdê Îmraliyî ser û vat: ''Ma do qetî tecrîdî bişiknê. Çunke tecrîd rojdemê welatî yo verên o. Seba ke qedexeyê çalakîyan biqedê, seba ke tecrîd û ablûqaya leşkerîye biqeda ganî ma nê prosesî de ser bikewê. Partîya Çep a Keske do na çarçewe de Meclîs de ganî xurt biba. Ma do pîya vera tecrîdî têkoşînêkê xurtî bikerê.''