Sekretera Huqûqî ya Egîtîm-Senî Arzu Şîmşek vera qiseyanê Wezîrê Perwerdeyê Mîlî yê Tirkî Yusuf Tekînî nêrazîbîyayîşê xo mojna ke vatbi ke domanê kênayî rîyê perwerdeyê têmîyanekî ra nêşinê dibistanan.
Wezîrê Perwerdeyê Mîlî yê Tirkî Yusuf Tekînî îdîa kerdbî ke seba ke perwerde têmîyanek o (Domanê kêna û lajî pîya perwerde gênê) keyeyî kênayanê xo nêşawenê dibistanan. Tekînî vatbi ke 'seba ke kênayî bişawîyê dibistanan ma do teyna seba kênayan dibistanan abikerê.'
Sekretera Huqûqî ya Egîtîm-Senî Arzuye Şîmşek derheqê babete de ANFyî rê qisey kerd.
Şîmşeke da zanayene ke na eşkerayîya wezîrî ra dima înan tira randevu waşto la hema cewab nêdîyayo înan.
Şîmşeke pare kerd ke sebebê kêmasîya perwerdegirewtişê kênayan perwerdeyo têmîyanek nîyo û vat: ''Qisey û kerdişê îqtîdarî ne zanistî yê ne zî akademîk ê. Perwerdeyo têmîyanek seba averşîyayîşê komelkî, şexsî, pedagojîk û perwerdeyî girîng o û lazim o. Qet yew xebata zanistî çin a ke vaja ke kênayî rîyê perwerdeyê têmîyanekî ra nêşinê dibistanan. Wezîr dibistananê kênayan sey çareserîye pêşkêş keno la a raşte no kerdiş do mesele mende bikero.''
Şîmşeke ard ziwan ke ê sey Egîtîm-Senî tim wazenê ke perwerdeyê cînsîyetê komelkî tim dibistanan de bêro mojnayene. Şîmşeke vat: ''Dibistanê kênayan û lajan ê cîyayî do bikerê ke şîdet, cînayetê seksîstî bizêdîyê. Perwerde sey heqêkê qanûnîyî sey karma ameyo pênasekerdene û ganî perwerde esasê têdûştîye de bêro dayene. Meqamê îdareyî mesuldar ê ke perwerdeyê winayênî pêşkêş bikerê.''
