Avûkatê Rayberê Şarê Kurdî Abdullah Ocalanî Emran Emekçîyî derheqê tecrîdê Îmraliyî de ANFyî rê qisey kerd.

Emran Emekçîyî da zanayene ke seba ke meseleya kurdan nêra çareserkerdene tecrîd yeno caardene û vat: ''Komployo Mîyanneteweyî hetê gladyoya herêmîye, NATO, Îngilîstan, Amerîka û Îsraîlî ra ameyo kerdene.''

Emekçîyî îfade kerd ke zemînê tecrîdî yo huqûqî çin o û vat: ''Yew eleqeyê tecrîdî û cezayanê dîsîplînî bi huqûqî çin o. Pêvînayîşî bi bahaneyan û cezayanê dîsîplînî yenê astengkerdene. Bira Hakîmîya Înfazî ya 20ê temmuza 2016î bîya sebebê astengkerdişê pêvînayîşan. Îmrali de sîstemêko winayên est o ke tede huqûq çin o. ke Bi ferasetê tecrîdî Îmrali ameyo awankerdene, yew têkilîya ci ya bi dinyaya bîne çin a û yeno manaya dardekerdişî.''

Emekçîyî dîyar kerd ke bi protokolê MÎT-CIA 4ê sibate de Îmrali ameyo awankerdene û 15ê Sibate de Abdullah Ocalan ameyo ardene bi Îmraliyî. Emekçîyî vat: ''Ney reyde madeya 5. ya Peymana Heqanê Merdiman a Ewropa ameya binpaykerdene. Nêbeno ke dewlete vera huqûqî têbigêra. La babeta Ocalanî de wina têgêraye. Mehkemeya Heqanê Merdiman a Ewropa no çi goreyê huqûqî dî.

CPTyî heta nika derheqê rewşa Ocalanî de cewabêko xurt nêdayo ma. CPT 23 serrî yo şino yeno, raporan amade keno, pêşnîyazan keno la Tirkîya pêşnîyazanê ci nêana. Rixmê nînan zî CPTyî vera Tirkîya tewirêko xurt nêmojnayo. Ma vînenê ke CPT çimanê xo kerdişanê Tirkîya rê qefilneno.''