Emîne Şenyaşara ke mêrde û 2 lajê ci hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde tewra Konferansa Demokrasî bîye.

Emîne Şenyaşar konferans de qisey kerd û da zanayene ke ê ameyî destbendkerdene, înan rê zulm dewam keno. Emîne Şenyaşar vat: ''Ma se kerdbi? Ê hende barbar ê. Erdoganî Îbrahîm Halîl Yildiz kerd wekîl. O merdim faîz weno, kiştox o û dizd o. Ey keyeyê mi çin kerd. Ez nêeşkena keye de vindera, serê sibayî wurzena şina. Wa lajê mi bêro veradayene. Ez edalet wazena. Pêro keyeyê mi kişîya. Ma têna meverdê.''

Dima Ferît Şenyaşarî qisey kerd û ard ziwan ke dosyaya qirkerdişî ser o bira nimite esta û heta edalet bêro caardene ê do têkoşînê xo rê dewam bikerê.

Emîne Şenyaşar û Ferît Şenyaşar dima şîyî Rêxistina HDPyî ya Îstanbulî û xeyma serweşîye ya Denîze Poyraz zîyaret kerde. Hemserekanê HDPyî yê Îstanbulî Elîfe Bulut û Erdal Avciyî serweşîye qebul kerde. Şenyaşaran zîyaret de HDPyî rê paştdayîşê xo ard ziwan.