Hemsereka TUHAY-DERî ya Amedî Yetere Erel derheqê tesîranê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Hemsereka Amedî ya TUHAY-DERî pare kerd ke bi tecrîdî yeno waştene ke îradeyê şarê kurdî wa bişikîyo. Yetere vat: ''Tecrîdê vera Abdullah Ocalanî mîyanê komelî de beno sebebê hêrsî. Na rewşe teyna kurdan rê ney tesîrê pêro beşanê komelî kena. Rewşê zîndanan xirab ê. 2023 ra nata tewr tay hezar û 600 tepişteyê nêweşî zîndanan de yê û 600ê nînan nêweşê giranî yê. Şert û mercê zîndanan vurîyayê ê îşkencexaneyan.''

Yetere Erel bale ante çalakîyanê keyeyanê tepişteyan û vat: ''Ma verê zîndanan de çalakîyê roniştişî kerdî. Çalakîyê ma yê 'Veng bizê azadîye' seba paştdayîşê çalakîyanê tepişteyan bîyî.  Xora çalakîyê ma do dewam bikerê. Ma têkoşînê xo rê bi qerardarî dewam bikerê. Nê prosesî de hetkarî û paştdayîşê şarê ma zaf girîng o.

Polîtîkayê tecrîdî hacetê zulmî yo ke tesîrê ma pêroyînan kenê. Ganî ma vera ney vinderê û rûmetê merdimatîye bipawê. Ma seba haştî, edalet û azadîye bibê yew û vengê xo berz bikerê. Ma xo vîr a nêkerê ke bêvengmendiş, yeno manaya hemkarîya zulmî. Ganî seba caardişê edaletî her kes destê ci ra çi bêro bikero. Ez venga şarê xo û rayaumûmîya mîyanneteweyîye danê ke ma vera tecrîd û zulmî pîya têkoşîn  bikerê û seba edalet û haştîye vengê xo berzêr bikerê.''