25ê adara 2021î ra nata Rayberê Şarê Kurdî Abdullah Ocalanî ra xeberêke nêna girewtene. Wekîlê Partîya Çep a Keske Serhat Erenî derheqê babete de ANFyî rê qisey kerd.

Erenî vist vîrî ke avûkatanê ci tewr peyên 7ê tebaxa 2019î de Abdullah Ocalan dîyo û vat: ''Tecrîd 24 serrî yo dewam keno. Keye û avûkatanê ci bi seyan reyî seba pêvînayîşî muracat kerd la cewab nêdîyeno înan. Mabênê 2013-2015î de wextê prosesê çareserîye de pêvînayîşî ameyêne kerdene. La 2015 ra dima prosesê çareserîye qedîya û tecrîd hîna giran ame kerdene. Çarçewa planê Çokdayîşî de bi tecrîd û îşkenceyî meseleya kurdan de çareserîye ameye peygoşkerdene. 

Eke tecrîd bêro wedaritene fikrê Abdullah Ocalanî meseleyan do çareser bikerê. La AKP ney nêwazeno. Birêz Ocalanî 2015 ra nata bi israrî modelêk pêşkêş kerd. Ey çareserîya meseleyan de israr kerd, xo ver da. La faşîzmê AKP-MHPyî bi tecrîdê giranî cewab da ey. Îqtîdarê AKP-MHPyî keno ke pê sîstemê tecrîd û îşkenceyî yê Îmraliyî îradeyê Birêz Ocalanî bişikno. Eke Ocalanî reyde pêvînayîşêk bêro kerdene seba prosesêkê neweyî îmkanî do bêrê afernayene.''

Erenî îfade kerd ke vera tecrîdê Îmraliyî vejîyayîş, vera polîtîkayanê şerî, xizanîye, vêşanîye û krîzî vejîyayîş o. Erenî vat: ''Ganî partîya muxalefetî, rêxistinê komelê sivîlî yê mîyanneteweyî seba wedarîyayîşê tecrîdî têbigêrê. Konseya Ewropa, CPT hetêkî ra wesfê xo danê ke ê wayîrê erj û huqûqî vejîyenê, la hetêkî ra zî vera bêhuqûqîya Tirkîya bêveng manenê. Se beno wa bibo mîsyonê înan o tarîxî est o. Eke no mîsyon nêro caardene seba haştî, azadîye, demokrasî, huqûq û edaletî gamêka xurte û pîle nêra eştene verê zaf çîyan do bêro akerdene.''